Rome 3:9-26

⁹?Ivei tea ighai, na vure Jew, tai uto vaa itadira na lei tinoni soko? Taho! Te vagha na hava tu bosai tua, na lei tinoni soko te vagha kau Jew pa kau mua Jew, ta ghahaghita udolu sarana na maana ni tangohahi.

¹⁰Te vagha na Gegere Tabu te bosaa, “Taho ahei ke maemane,

¹¹Me taho ahei ke loghoa na puku ni manaha, mana kene taoniana God.

¹²Gaira udolu tara ririu keha itatana God, mara taonia na hahi. Taho siki sakai ke gehegehe uto, Taho tua hei.

¹³Na kokoedira te mabulu, te vagha na tavughi te tatavanga te uru angiangi, mana bosadira te vonughighi na pego. Tara lavimataghu te vagha na malina na poli, Te horu mai tana ghidudira.

¹⁴Na mangadira te vonughighi na vavaranga mana rutu papara.

¹⁵Mara gonidila haia tua na labu mate tinoni,

¹⁶Ivei tua kara vaa, na haurake mana taghalaghi mana dikalio, ke tumurira.

¹⁷Ma gaira tara mua ghilala ivei kara nea na kabu mabo.

¹⁸Mana nia kikinima God te taho itadira.”

¹⁹Te vagha ta ghilala, na lei totobo ilokana na vetena ke, tara vanira gaira God te vahera mai tua, ge na lei tinoni kara bei nighi hughu gea, me tatea te ulaghana God ke detea na maramana udolu.

²⁰Keri ke, taho ahei ke talu maemanea heghena, tana matana God, nia na gonitaoniana na hava na vetena te bosa. E utuni na pukuna tana bona ka ghilala vakodo utoa nina vetena God ke, geva ka righi kale utoa ta kabu hahi.

²¹Mi taeni, God te talutate utoa vanighita tua na halautu keha ni kabu maemane tana matana. Ta mua kabu taoniana na vetena, hauva ta taoniana na halautu God te nia baubahu te hau mai tua tana Gegere Tabu.

²²Mi ghita God ke talu maemaneghita tana matana, ta dida taluutuni tatana Jesus Christ. Na lei tinoni soko God ke tangomana ge ke vavolaghita tana na halautu vaghana eni, na pukuna ta sakai na vata vamua tana matana God.

²³Na pukuna na lei tinoni soko tara tangohahi, mara kubolu ta nina kaekage ni rongoragha God.

²⁴Hauva mi taeni, taonia nina sonihalavu ni dolo God, te bosa tatavahaleghita ta maemane, na pukuna Jesus Christ te huiolighita tana lei paluda.

²⁵Ma God te nia vetena mai Jesus, ge vahaghitaili tughui na lei paluda, te vuevughe tughughita ta nina rutu God. Ighita ta maemane tana matana God tana bona ka taluutunia Jesus te tave na ghabuna me mate tua vanighita. Aeni God te nea, ge ke talutate gaia te maemane. Idania, God te nea na hava te maemane tana bona te kabu rurughu me mua hera na totoro rana hahi.

²⁶Mi taeni God te maemane tana bona te dete maemanera na lei tinoni hahi tana matana, na pukuna tara taluutunia Jesus.