Rom 3:9-26

⁹Me eau tai la tau Iuda, me mave, amite ge veia amite balavati, La Uru masaga moli amiteu, eia kama masaga egiteu la valalua ale isapolo, etato ge veia maie, ia? Ouka. Etatou la tahalo la vovo tomi, la vulovulo la iruru eia kisi roboti etatou, isa kama maroka.

¹⁰Mai La Buk Tabu Ale Pala eia veia: La tahalo la marokala isa kama oio.

¹¹La tahalo isa ouka oio ale rovi la vulovulo La Tahalo Uru. La tahalo isa ouka oio tai ale paa muli vagari la gauru tetala.

¹²La valalua tomi poke taroti La Tahalo Uru; egiteu tomi ruruti; isa kama lagu tavu la matagaga, ouka gologolo.

¹³Oio te la merera la visigologolola ale loio te la hare giteu, la valalua ge poga la pileho. La merera tegiteu eia viruru la valalua, eia bilibili egiteu ale mulimulia.

¹⁴La gililo moli eia oio voluti te la hare giteu.

¹⁵Egite vagari tavu moli la bilili.

¹⁶La gauru tegiteu ale egite poloti ovola, la gauru la pileho me la iloburukola moli.

¹⁷Egite kama vikara tigi veia la valalua ge vipuhi tigi, egite visibitala moli la marapala me la vaubila.

¹⁸Egite kama gabutatalea veia ge togo bakisi La Tahalo Uru, veia ge taga la vagagarila tetala ale uru, ouka viruru.

¹⁹Eala moli etato matagagati veia la merera te La Tahalo Uru eia veipalea somai tamiteu e Iuda. Eala isa tamiteu umala ge vikara papai lou. La merera te La Tahalo Uru eia matagagati, eia koramulia veia eia ge veipala la vulovulola soio te la maututula tomi, la valalua me hatavivile kamati ge ruru bulalahu mai egiteu ale pala.

²⁰Me isasa kama koramulia veia ge toia soio te La Uru veia eia tilimuli tomiti la merera tetala, veia eia marokati mai ele, ouka. La igogolu te la merera tetala eia maie, eia ge vahilo letatou la iruru tomi ale etato igigoa.

²¹La merera te La Tahalo Uru eia vimatagaga etatou veia etato boto, eala moli te la imamala ale igoie La Tahalo Uru eia veipalati la gauru ale eia ge igo maroka lou etatou oio vola, me eia kama mai la gauru ale pala, ale etato boruti ovola, ale etato tovo lalaia veia ge tilimuli la imoimo la merera tetala tomi, ouka. La gauru ale igoie eia veipalatia, eia isapolo te aleie, eala moli la merera te Moses me la merera tegiteu la bilalaha ale pala, eia turitia gatou.

²²La Tahalo Uru eia ge igo maroka lou etatou, mai etato ge sau tola e Kraist, veia ge toro moli tetala. La gauru ale, etato tomi ge polo ovola, eia kama ge toi tabaribari la maratatila la valalua, ouka.

²³Etato la valalua me hatavivile tomi ruruti, etato tomi boto, etato tomi kama koramuli la matagaga tetala.

²⁴Eala moli La Tahalo Uru eia gogoti etatou, eia sugu taro e Latula soio te la valalua la gima veia mai etato ge gabu tikumu la pileho tetala, ale eia lube etatou taro la kilisi te Satan oio vola, tio eia ge igo maroka lou la vulovulo gatou mai ele. La gilogo tetalale, eia abi bulalahu molia gatou.

²⁵La Tahalo Uru, eia rou roboti letatou e Latula, veia eia ge peho robo etatou, veia ge vimavulaha taro letatou mai ele la iruru tegatou tomi isasasa, mai etato ge tautaulailo tetala. Eia igoa mai ele veia ge veipala la vulovulola ale eia taritigi tomi moli. Ale pala, eia kama koli harari la iruru tegatou,

²⁶eala moli te la imamala ale igoie, eia igoti la gauru ale etato ge goilo tetala, mai etato ge gabu tikumu la pileho te Latula. Me oio moli ovolale eia veia ge vahilo letatou la vulovulola ale eia matata sesele tomi moli.