Wafilipi 2:1-15

¹Ujima wenyu mwa Kulisito wawatogezani naho kunga kwakwe Kulisito kwawahozani. Mna ndala hamwenga na Muye Ukukile naho mna moyo wedi naho wa mbazi kwa chila yumwenga.

²Elo, dumizani kubweda kwangu mkatenda na fanyanyi za chalumwe kunga kuligane na umwenga.

³Msekudamanya chochose kwa finju hegu kwa kwefenya vya bule Mna chila mntu amtunye mnyawe amwone mtuhu kugamba ni mtana kwejinka mwenye.

⁴Chila mntu asekusinya mbuli zakwe mwenye du mna asinye mbuli za watuhu.

⁵Mtende na fanyanyi idya yendaga mwa Kulisito Yesu

⁶Uyo, kukongela chikale endaga kekala saviya Chohile Mna hafanyanye kugamba kuligana na Chohile ni chintu cha kutozesa

⁷Kadula vyose niyo eliganya na mtumwa keliganya na mtumwa, niyo elekwa mntu.

⁸Kanyanyahala na kwiva kubula kubanika, hata kubanika kwakwe mo msalaba.

⁹Ivyo Chohile kamkwezesa kulanga, niyo amwinka zina dikujinka mazina yose.

¹⁰Chani kwa ntunyo ya zina dya Yesu, vyumbe vyose kwembingu na mwe isi na kuzimu, vifike madi kulongozi kwakwe,

¹¹na chila mlomo na uzumile kugamba Yesu Kulisito ni Zumbe, kwa ukulu wa Chohile Tate.

¹²Weyangu hunga, hadya nendaga na nyuwe na mniva mazuwa yose, kubula haluse hatenda hale na nyuwe mkaniva. Jendelezani kudamanya kwa kogoha na kuzingiza ya kulagisa kugamba mwambulwa.

¹³Kwaviya Chohile nuyo akudamanya ndima mazuwa yose mwenye, na kuwenkani udahi wa kunga na kuchintiza mzungu wakwe mwenye.

¹⁴Damanyani chila chintu hehena kufuzuma naho msekuhigana.

¹⁵Chani mtende wantu wedi, hewena katitu, saviya wana wa Chohile wachumile wakwikala mwe wantu wavu naho wagile we isi ino. Mwaungwa mlangaze mgati mwa wantu wano saviya ntondo zikulangaza mo ulanga,