Filipos 2:1-15

¹Nosorollan ku no no-inniyat kow pomon to nosokkad kowd diyot ki Disas Krays, woy nahaa kow su id dokollan kow nikandin to ginawa. Nokodsokkad kow mandad ukit to Uhis no Ispiritu, woy id pohinowannoy kow woy eeruwon diyot ipat sokkad.

²De-en od buyuwon ku koniyu, no iponnuwa a nikiyu to kahaan ukit to kodpohinowannoy woy kodposokaddoy row woy ukit to kodsokkad to koniyun poomdom woy dontulon.

³Yo kow'd puung to ahad ondan ukit to kodporatasdatas to koniyun ko-ugolingun, ko konna, ko-ilangan nod poobbava kow riyot duma, woy mowwet pa kos kod-ontong dow kandan kuntra taddot kod-ontong dow to koniyun ko-ugolingun.

⁴Konna ra iddos koniyun kopiyannan kos od poomdommon dow, ko konna, idda mandad so kopiyannan to duma.

⁵Ko-ilangan no iyon dow od ikulon, iddos botasan ni Disas Krays.

⁶Ahad Monama sikandin, piru waa sikandin id popoomdom nod pokidtoppong to Monamon Amoy rin ukit to kandin no konokkaan.

⁷Waa rin gomita kos pogko-monama rin, woy nominuvu sikandin iling keta woy id bovotasan to botasan to uripon.

⁸Id poobbava sikandin woy id tuman to langun no id kopi-it Monama, ahad pa taman to moko-ilow-ilow no kopotayan din diyon to krus.

⁹De-en id poratas sikandin to Monama ukit to waa toppong no kodposivantug, woy id boggayan din sikandin to ngaran no lampas to langun no ngaran, no iddos kohulugan, motuus to langun no motuus.

¹⁰Id puungan ini to Monama, su amoy iddos langun no id pon-oubpa riyot datas to langit, woy dos ka-ay to ampow't ingod, ahad pa iddos diyot daom to livuta, od lingko-od diyot isowwan ni Disas Krays amoy'd simba kandin.

¹¹Woy dos langun, od ikahi no si Disas Krays en kos od Longaggon, woy ukit ka-ay, od koposivontuhan kos Monamon Amoy.

¹²Purisu id ginowannan ku no mgo suwod, su inaayun kow man id tuman to nonaw ku to riyon a pa to koniyu, lampas pe-en ko-ungkay no wora ad duwot koniyu. Ko-ilangan no duwon allak dow to Monama, woy ko-ilangan no iddos ipat sokkad koniyu, od nokkaanokkaa nod ipongnga taddot pinuungan no id tigkonayan to Monama riyot ginawa row iddot kodtobbus din koniyu.

¹³Su iddos Monama, od boggoy koniyu to ingowollon woy kogahan no od puung to kandin nid kopi-i.

¹⁴Na riyot langun nod puungan dow, puungi row idda no wora kodpommivig woy kodpo-op-opuloy,

¹⁵su amoy waa id pokosawoy koniyu no mgo anak to Monama. Ko-ilangan no molinis kos ko-ubpa row, laggun tod oubpa kow duma to mgo ebbaw woy morat no mgo minuvu ka-ay to ampow't ingod. Od poko-iling kow to mgo bitu-on diyot datas to langit no od pokotaddow kandan.