Filipi 2:1-15

¹Iwe, manauemi lon Kraist a apöchöküla letipemi, an chen a echipakemi, oua chiechifengen me Ngünmifel, oua pwal eäni kirikiröch me tongfengen lefilemi.

²Iei mine üa pese ngenikemi ämi oupwe föri met ai pwapwa epwe unus ren. Oupwe eäni eu chök ekiek, eu chök chen, oupwe pwal ngün eu me tipeeu.

³Ousap föri föförün apangau are föri och ekiekin sikesik, nge oupwe tipetekisonfengen lefilemi, ousap ekieki pwe oua mürina seni ekewe ekoch.

⁴Ousap chök ekieki en me an feiöch, nge oupwe pwal ekieki feiöchün chienemi.

⁵Oupwe eäni ewe chök ekiek Kraist Jesus a eäni:

⁶A lapalapeni lapalapen Kot, nge esap ekiekin amwöchünükü an wewe ngeni Kot usun ach amwöchünükü mettochüch.

⁷Nge seni lon letipan a fangala meinisin mine a eäni, pwe a lapalapeni lapalapen eman chon angang. A wiliti ususun aramas o pomweni pomwen aramas.

⁸A püsin atekisonatiu o eäni aleasochis tori mäla, tori an mäla won iräpenges.

⁹Iei mine Kot a atekiatai won eu leni mi fokun tekia, a pwal ngeni eu it mi iteföüla seni it meinisin.

¹⁰Iwe, chokewe meinisin mi nom won läng me fanüfan pwal failol repwe fotopwäsuk o asamolu ewe it iten Jesus,

¹¹nge ir meinisin repwe pwärätä pwe Jesus Kraist i Samol, pwe Kot Sam epwe ling ren.

¹²Iei mine chienei kana mi achengicheng, usun ämi oua aleasochisiei fansoun meinisin lupwen üa nonom remi, iei usun a men aüchea ämi oupwe aleasochisiei lupwen üa toau senikemi. Oupwe achocho le anganga püsin ämi küna manau fän niuokus me chechech,

¹³pun Kot ewe a angang lomi, epwe afisätä ämi mochen me ämi tufichin apwönüetä letipan.

¹⁴Oupwe föri ämi angang meinisin, nge ousap lal are anini,

¹⁵pwe esap wor och mi mwäl lon manauemi, nge oupwe limöch usun nöün Kot kana mi unusöch ra nonom won ei fanüfan mi ur ren aramas mi kirikiringau me tipis. Oupwe fokun tittin lefiler usun ekewe fü ra tittin fän läng,