Wafilipi 2:1-15

¹Ndaze, kikala kwa hemwe kuli kilumba na Yesu Kilistu kwanguwakangaza? Ndaze, igano lya heye lyanguwahembuliza? Ndaze, mwahamwe na Muhe Yelile na muwele na nhumbula inojile na kiwonela isungu?

²Lelo mndite heni sangalale ng'hatu kwa kuwa na majesa ga uhamwe, igano limwe, nhumbula imwe na mchijesa hamwe.

³Mleche kudita chinhu choneche kwa fihi ama kwa kidaya hela, ila kwa kuholondala na igano hemwe kwa hemwe, na chila yumwe yamone miyage kota katanganika kusinda heye yuye.

⁴Chila munhu yaleche kupala mbuli zoyalingugana heye yuye hela, ila yalole mbuli zowalingugana wayage.

⁵Muwe na majesa gagala kota yawelenago Yesu Kilistu.

⁶Heye vyoyali, nayali Nguluwi ng'hatu, Ila hejesile kota kula kiwhana na Nguluwi, ndo chinhu cha kibatilila.

⁷Ila kwa kugana kwa heye yuye, na kagaleka ago geng'ha, nakedita kota vyoyawele chitumagwa, nakavumbuka kota munhu, kota vila wanhu wanji vyowalinguvumbuka.

⁸Nayali liholile na kuhulichiza geng'ha mbaka kabagama, ena, kabagama mumsalaba.

⁹Kwa mbuli ayo, Nguluwi nakamkwiniza kuchanya ng'hatu, nakapegwa itagwa liwele likulu kusinda matagwa geng'ha.

¹⁰Leka, kwa kutanganika kwa itagwa lya Yesu, vilumbigwe vyeng'ha kilanga na mu isi na kuli isi ya wabagame, vyomfugamila heye,

¹¹Na chila lumyango nalulonje, Yesu Kilistu ndo Mkulu, kwa ukulu wa Nguluwi Mhaza.

¹²Lelo wang'holozangu, kota hila navyomnyhulichize mazuwa gesa vyonandali hamwe na hemwe, na sambi vyombele kutali na hemwe mlutilile kunyulichiza. Mkole mijito kwa kudumba na kukakama mlajile kwa madito ga hemwe kota mloholigwa,

¹³kwa vila Nguluwi ndoyalingudita mijito ng'hatu mgati mwa hemwe, na kuwapa nhumbula ya kugana na ludali lwa kudita mbuli yoyalingugana heye yuye.

¹⁴Mkole chila chinhu ne kung'ung'uta na kuwa hela ibamba,

¹⁵leka muwe wanhu welile, walihela nongwa, kota wana walingumhulichiza Nguluwi na walingikala kuli isi yihile na wanhu wajilile. Mobunguzuka hali hewo kota nhondwe zilingumwemwesa kuulanga,