Filipai 2:1-15

¹Iŋini Kraistpuk qekötahöba kinjeaŋgöra mönö uruŋini naŋgöm aŋgubingö qambaŋ miwikŋaime. Urukalemŋini miaŋön mönö urukölalep ak aŋgumakŋe. Uŋa Töröŋambuk ösupköba kinda waikŋini memba ak kömum aŋgumakŋe.

²Mewö akzeaŋgöra mönö mötmöt mohot wuataŋgöba öröröŋ jöpaköm aŋguba luainöŋ malme. Urusihimŋini mönö mötmöt areŋ mohot akingöra jöhöme. Keu mewö jöhöba urumohot aketka ölŋi asuhui möta nöŋön eŋgöra önöŋi qahö söŋgaiba malmam.

³Öröyuai nanŋinaŋgörök öröbingö sihimŋan mönö kude nam köl eŋgima. Nanŋini qetbuŋaŋinan qarimapköra mönö sileŋini kude memba öŋgömemö, uruŋini memba et ala tosatŋi yeŋgöra mötketka öŋgömakŋa.

⁴Iŋini mohot mohot mönö nanŋini uruŋinanök ölöwakŋapköra kude mötmörimemö, tosatŋi yeŋgö uruŋinan ölöwakŋapköra mewöyök kapaŋ köla mötmörim yaköme.

⁵Kraist Jisösnöŋ gölmenöŋ maliga imbi mötmöt ahöm waŋgiyöhi, miyöhök mönö eŋgöreŋ ahöi mi wuataŋgöba malme.

⁶Anutugö kaisoŋgolom tandökŋi ahöm waŋgii malökmö, töndup Anutugö dop malöhaŋgöreŋ qahö möndöba aiweliköba malök.

⁷Mewö qahöpmö, nanŋak amqeba Anutugö asakmararaŋi mosöta eta meleŋda azi tandök asuhuba welenqeqegö kaisoŋgolomŋi memba malök. Mönö gölme azi nanini tandök aka malök.

⁸Mewö mala uruŋi memba et al aŋguba Iwiŋaŋgö keu jitŋi nalö dop tem köla malök. Mewö maliga gamu qem waŋgiba “Maripomnöŋ qebin,” jigetmö, nalö miaŋgöreŋ mewöyök tem köl teköyök.

⁹Mewö tem köla malöhaŋgöra aka Anutunöŋ waŋgiriga euyaŋgöreŋ öŋgöba tariga qetbuŋa waŋgiyöhi, miaŋön qet tosatŋi pakpak eŋgoŋgita aködamunŋambuk akza.

¹⁰Anutunöŋ qetbuŋa öŋgöŋgöŋi mi kewögöra waŋgiyök: Ambazip körek pakpak neŋön mönö qet miaŋgöra aka nalö kunöŋ simin köla möpöseim waŋgibin. Tosatŋan Suep mire euyaŋgöreŋ malje. Tosatŋan gölmenöŋ ki maljin. Tosatŋan kömumba uŋem mire me senjom mire malje. Neŋön mönö körekmakörek mindiriba sipköba simin köl waŋgibin.

¹¹Körek nini simin köl waŋgiba numbu nesilam dop Iwi Anutu aukŋe göda qebingöra qetŋi jim miwikŋaiba kewö jibin, “Jisös Kraistnöŋ mönö Kembu ak neŋgiza.” Mewö.

¹²Miaŋgöra wölböt alaurupni, iŋini mönö Kraistkö söpsöpŋi wuataŋgöba miaŋgöreŋ kude sörauba etme. Nalö dop Anutugö keu tem köla letota malgeri, miaŋgö dop silik urumeleŋ ambazip eŋgöreŋ dop köljawi, mi mönö kapaŋ köla wuataŋgöba urugö nup memba malme. Nöŋön embuk malali, nalö miaŋgöreŋ Buŋa keu ölöpŋanök köl guliba zeŋ kinda malget. Eŋgömosöta sikep maljalaŋgöreŋ mönö mewöŋanök Anutugö jeŋe sömbuŋinambuk möta jönömŋini unduiga pöndaŋ nup mi mem soroköba malme.

¹³Anutunöŋ nanŋak mönö iŋini sundan sölölöhöba nam köl eŋgiba nanŋi areŋaŋgö dop uruŋini kuŋgumakza. Mewö urusihimŋini Anutu dop köl waŋgimawaŋgö dop ahuiga inahöm eŋgiiga nupŋi megetka ölŋi asuhumakŋa.

¹⁴Galömurupŋini yembuk keu mekömpötak kude aka malme. Jimoŋgot aka urunöŋ ihururuk laŋ kude ahakŋemö, areŋini pakpak mönö uruyahöt ziakpiak mosöta töp memba malme.

¹⁵Ahakmemeŋinan mönö köpösihitkö keuŋi qahö sarakŋi aka memba malme. Ambazip goŋgoŋi misimkaulup merak gölmenöŋ maljei, iŋini mönö yeŋgö sutŋine Anutugö nahönbörat solan sorokŋi malme. Seŋgelau suepnöŋ eu asarizei, iŋini mönö mewöŋanök gölmenöŋ silik ölöpŋi aka miaŋön ambazip asarim eŋgiba malme.