Pilipi 2:1-15

¹Na, ena henuaadidiri Keriso arinai ie ota, eo ena gadosisi nuaamnana ie ota, eo ena Earuana heoiesegaina ie ota, eo ena nuatoatoa eo nuabigabiga se ota,

²egu kode ta au hemamohoiei, tabu nuamiu udoi, udoi, emi gadosisi esega mo, emi nuatu esega, nuamiu esega.

³Tabu ginauri esau lulu eo haisaesae aridi eai au haihesaba; na nuatudobidobi eai tau esau ena nuatu i ene ana sagu mo i lolo ariri.

⁴Tabu tau esau eo tau esau iabom ena dobila mo i nuanuatui, na tau esau eo tau esau hari tatao edi dobila hinage se nuanuatuidi.

⁵Keriso Iesu nuana omi au abi hinage, nuamiu,

⁶ia itaitana Eaubada mo itaitana, ia nige i nuatui i aiaigirihai doha i ene ia eo Eaubada gonogonoadi,

⁷na i hemala wasakulobai, itaitana doha tauheaheari, eo ia se ginauri ana ao doha tatao adi ao.

⁸Ia i hemala tau, abo iabom i nuatudobidobiuioi, mate awaabina i awaabiei, mamohoi, satauro matena eai hinage.

⁹Arinai hinage Eaubada ia i hedebasae‐aririei, ia esana hinage i mosei esadi gamagamagari i saetawatawaidi,

¹⁰Iesu esana eai gamagaridi turidi se bonodi, galewa ginauridi, eo tanoubu ginauridi, eo tanoubu ubuna ginauridi hinage,

¹¹memena gamagamagari abo se ribahemasaraha, abo si ene Iesu Keriso ia Guiau ede, Eaubada Tamada arinai se hedebasaei.

¹²Egu nuanuai e, doha huia gamagamagari au awaabi, na eau arimiu eai mo nige’e, huia ta ea miasuaraemiu hinage, emi mauri paisoana au paisoaei ma nuamatamatausimiu eo ma nuatabutabubumiu.

¹³Paana ede Eaubada nuaboeamiu eai i paipaisoa ena nuatu lolona abo au matamatayariedi eo au abiabiwataidi.

¹⁴Ginauri gamagaridi au paisoaedi tabu au gadigadigugu eo tabu au haiawayagara,

¹⁵abo nige au baaea eo nige au manamanabara, Eaubada nanatunayao omi, arimiu eai nige edi abaribaribasuu, omi eanua nuanuatugewagewadi eo awaawayagaradi boeadi eai, eo boeadi eai abo au mara doha lamepa tanoubu eai,