Pilipai 2:1-15

¹La꞉ numa꞉la꞉, la꞉ Kelisoko ipuwalo ebegodone helo a꞉lawenakomata, ba꞉gala la꞉ temeteme ipuwalo ebeno malemale komodo gelebadi iya꞉tawahanakomata, ba꞉gala la꞉ ebeno Gobogobago kapimilo a꞉wapata꞉lamenakomata, ba꞉gala la꞉eno tepo ipuwalo etapa꞉te etapa꞉tamo malemale a꞉hawakaliminakomata.

²Ba꞉moe ba꞉be mabuma꞉ wadiyala la꞉ naeno kalakala ba꞉ma ka꞉na na꞉koiminala꞉, la꞉ ukui kapiyalo ba emedena etapa꞉te etapi atu malemale komamo nemalagidolenala꞉, iyo, la꞉eno tepo ipuwalo kapiyama꞉ ba eda꞉hana la꞉le oko owatima꞉ ubi komo kapiyanomoma꞉ na꞉midinakuya꞉la꞉.

³Ba꞉bema꞉ la꞉ ipuwalo etate ebe ha꞉kiya ebe kapiya emalagidolo komone o awagaha komone eta komo akododa꞉la꞉, huiyatiya wadiyala la꞉ ha꞉kiya la꞉ hopamo ba miya꞉tena, la꞉eno tepo ipuwoeno ukuilo komo hibima꞉ midipi kokopima꞉ na꞉midilinakuya꞉la꞉.

⁴Ba꞉bene la꞉ ipuwalo etate ebe ha꞉kiya ebeno komo kapiya akemalagidolonakala꞉, ao, ebete huiyatiya komopino modoboha꞉ komo ebeno modoboha꞉ komago kapimilo nulamenakamene.

⁵Ba꞉be mabuma꞉ wadiyala Ya꞉su Kelisokono tepo ipuwalo ditana, ba꞉be atu malemale ukui komote la꞉ ipuwalo oko nowatinamene.

⁶Ebete dopamo Godokono holoholo kapiyamo emedenami, huiyatiya a owalubi tete duluhukuya꞉, ebe ha꞉kiya ebeno ubi komo kemalagidoloma꞉ ebete Godoma꞉ deda꞉na ba꞉be komo kodakodalo kalawiya꞉ha꞉.

⁷Ebete huiyatiya ebeno ko gawadalagi emede bahi tama꞉mo kalakalago ba ihate, ebete hopo lumagima꞉ eda꞉te tawakalubino holoholamo atamo ba꞉bo pehawakaluya꞉, iyo, ebete huiyaha꞉ okodawoeno holoholamo puluhukuya꞉.

⁸Ba꞉bene ebete ebe ha꞉kiya hopamo ba ihatena ebeno Nabiwino ubi komamo ba꞉bo papamiwatanakui, ba꞉bema꞉ ebeno papamiwata ipuwalo ebete ebeno hoe komoma꞉ modoboma꞉ goiya꞉, iyo, ebete keha pihigalo koko temeteme ba꞉ dito uwatiya꞉.

⁹Ba꞉moe ba꞉be mabuma꞉ Godote ebe hununomamo adipatete eta hidonomo mahilo ebetamo ba꞉bo ikamiya꞉, ba꞉be mahiloeno helote komo mahilo hiliyonomoeno helo na꞉gogolena,

¹⁰iyo, ba꞉be mahilo ba꞉ Ya꞉sutila! Ba꞉bema꞉ puya꞉te Hunu Habalo ba꞉gala hopo habalo ba꞉gala haka ipuwalo demedehona, ibi hiliyonomate ebe adikumima꞉ pupamo pegagahiditi,

¹¹iba꞉te Nabiwi Godoko ba milimiho hawakala na꞉ga꞉lanakamena꞉, Ya꞉su Kelisoko kapiya ba꞉ Kodawala.

¹²Ba꞉bema꞉ naeno hidohido mabuluba꞉la꞉, dopamo na la꞉eno habalo ba emedena la꞉ naeno tabamo keba ka꞉na ka꞉papamila꞉honakuima, wadiyala nale lutaha꞉ tetelo la꞉le ba꞉ ba꞉ba ka꞉na na꞉kewagelenala꞉, iyo, la꞉ naeno iya꞉tulame komamo papamila꞉hama꞉ la꞉eno ukui konomamo nihatenakuya꞉la꞉. Ba꞉gala Godote la꞉tamo dikalami, ba꞉be ka꞉ka꞉ mula꞉ komoeno kuititi komo hibilo lawema꞉, wadiyala la꞉ la꞉eno ukuilo ebe tolemelo hunamo ba adipate oko hidamo nowatihonala꞉,

¹³mabu kalakala konomola, Godote ba꞉ la꞉ ipuwalo ebeno oko bowatina, iyo, ebete la꞉tamo hidohido tepo ipuwoeno ukui ba꞉gala helo bikalamenata la꞉le ebeno ubi komamo kopapamila꞉hanama꞉!

¹⁴Ba꞉bema꞉ la꞉eno ododili komo hiliyonomo ipuwalo etapa꞉te etapa꞉tamo ubiha꞉ tabo ga꞉laheno akolowabeletihuinakala꞉.

¹⁵Ba꞉ ba꞉ma ka꞉na ba꞉moe hopo habanapa꞉te koko kuba ododilipima꞉ eda꞉hate keka꞉keka꞉ gabodo ba tolamena, la꞉ huiyatiya Godokono hidohidonomo gugudima꞉ beda꞉hanamata, iyo, la꞉godolo eta kuba ododi komo ba꞉gala eta dalowa꞉ ukui komo deha꞉potonomote a꞉kitanamene. Ba꞉bene la꞉le tawakaluba꞉tamo Godokono ka꞉ka꞉ tabo dikalamenakoma, la꞉le ebeno aloma꞉ ba eda꞉hana ba꞉moe hopo ba꞉la꞉minanamata, olokiti alomo hunulu da꞉pola꞉na keba ka꞉nala꞉ka꞉ ba꞉ba ka꞉na. Ba꞉moe ba꞉be mabuma꞉ nale Kelisokono Kuititi Hegelalo ba꞉moe komo kiya꞉tawama꞉nemo, nale kebe oko la꞉ ipuwalo dowatinamimo ba꞉be kodakoda oko ipuwane hidohido gaote hibinomolo a꞉pikuliya꞉, iyo, nale la꞉ mabuma꞉ ba꞉bema꞉ kawagahama꞉nemo.