Filipiyankooɓe 2:1-15

¹Wanaa Almasiihu na sellina ɓerɗe mon naa? Wanaa njinngu muuɗum na waaltina hakkillo mon naa? Wanaa ko kawtuɗon e Ruuhu Ceniiɗo, on keɓii korsa e yurmeende naa?

²Si wo noon fu, laatoɗon hakkillo wooto, ngondon e njinngu ngootu e ɓernde wootere e anniya gooto. Ndeen on kiɓɓinan seyo am.

³Taa ngolliree huunde fuu saabe yidde hoorem naa saabe mawnitaare ɓolde. Ngolliree leeƴinkinaare, faa mono fuu ndaarda hoore muuɗum banndum ina ɓuri ɗum.

⁴Taa fay gooto mooɗon ndaarta ko nafata hoore muuɗum tan, ammaa ndaarta nafaa woɓɓe du.

⁵Ngorron hakkunde mooɗon hono no Iisaa Almasiihu worrunoo:

⁶Kanko, fay si taweede tagaadi Laamɗo ina woni e makko, o tiigaaki ɗum faa o heddoo fotude e Laamɗo,

⁷de o jippini hoore makko faa ley, o hooƴi tagaadi maccuɗo, o laatii hono ɓii-Aadama. O jogoraama wo o neɗɗo.

⁸O leeƴini hoore makko, o ɗowtanii Laamɗo faa o maayi, maayde dow leggal.

⁹Ɗuum waɗi de Laamɗo toownii mo sanne, hokki mo innde ɓurnde inɗe fuu,

¹⁰faa koppi fuu koforoo saabe innde makko to tawaa fuu, nde wo dow kammu, nde wo dow leydi, nde wo ley leydi,

¹¹faa ɗemle fuu ceedoo, mbi'a Iisaa Almasiihu woni Joomiraaɗo, faa Laamɗo Baaba meeɗen teddinee.

¹²Saabe ɗuum, sakiraaɓe am horsuɓe, tinnoɗon e gollande Laamɗo saabe kisindam ɗam hokki on ɗaam faa ɗam rima nafaa. Ngaɗiron ɗum kulol e diwngol. Si goonga, on ɗowtanake mo wakkati mo ngondunoomi e mooɗon oon fuu. Ko mboɗɗiimi on joonin du, sanaa ɗowtanoɗon mo faa ɓura noon.

¹³Sabo Laamɗo e hoore muuɗum ina golla e mooɗon faa muuyon ko weli ɗum, de ngollon muuyɗe ɗeen.

¹⁴Ko ngolloton fuu, taa ŋurŋurton, taa ndukidon,

¹⁵faa laatoɗon laaɓuɓe ɓe ngalaa feloore, laatoɗon ɓiɓɓe Laamɗo ɓe ngalaa laru hakkunde yimɓe hannden oonyiiɓe bonɓe ɓeen. Sanaa njaynon hakkunde maɓɓe hono no koode njaynirta ley aduna ni,