Tukpɔɠaaleʋe Nuiti 16:13-17

¹³Dalila ɠɛni Samesɔn ma: «Zaaɠaza ɗa gàaɓoloɠazu, zɛɛiti nɔ ɠa è ti wosu mà. Dɛɛ ga ze, nii nu ɠa è ɠili la.» Samesɔn ɠɛni ma: «Ni ɗa nɔ̀un kpaɠa lɔfelaiti fɛlɛna geze vɛlɛ ɓakogi zu, è ti zei da ga pagɔ ga gului, nà ʋala nà-zɛbɛi ma, nà ɠɛ eɠɛʋelei nuɓusɛi mɔtaiti ti la.»

¹⁴Kɛai ma ɲiizu, Dalila nɔun kpaɠa lɔfelaiti fɛlɛni geze vɛlɛ ɓakogi zu, è ti zei da ga pagɔ ga gului. É ɠɛni ma: «Filiseti nuiti ta ga è zo, Samesɔn!» É wuunni, é ɠula ná-ɲiimɛnii zu, é kpako guluiti tɔɔɠulani.

¹⁵Dalila ɠɛni ma: «Ɗa zoo ɠale è ɠɛ mà: ‹Gè è nɛɛʋɛ ʋɛ.› È la laani dà! Wɛlɛ, ná zeizu ɠɛa saʋa, è ɗa gàaɓoloɠa, è la kɛɛni, è ʋa ɗa-zɛbɛ wolai zeɠezuʋɛ lɛ ga ze.»

¹⁶Tɛi folo-o-folo é ɠɛni kpɔlɔzu, é ɗa zelii lo ma ga daawooiti, saa wɔin soni.

¹⁷É ɠoozu vai pɛ boni ma, é ɠɛ ma: «Kpeka la dɛ vɔɔɠuni nɔ̀ungi ʋa, tɔɔzei gè yɛni dèe ɠoozu, gè ɠaliva GALA ma. Ni nɔ̀ungi a wona, nà ʋala nà-zɛbɛi ma, nà ɠɛ eɠɛʋelei nuɓusɛi mɔtaiti ti la.»