Te Israel Tobolu Bidi Dabe 16:13-17

¹³Tialima, Delailago Samsonbolo te po walali, “Nago enaba te tibo po wabogo te ena ma poma palali. Megi da, te nago enabolo mu po dolo te nage te bidi dabego mena tama kę emainu yabo po waibawe?” Tama agai te po wai, “Te e nago eno bobage tobolu nisi duani te haliga a naga olama, me si tiwai elalubo, te selama, tama nago bomonama te blanket ugwa nigibo masin bono string tomoba kęnama, tama bobage medabu selama, tama bomonama elibaso da, te tobolu nisi mu dąų ola saibao, te tama tebo si te eno bomo meniama, te ena te gasa olo bidi dabe tiwai naga pedelaibao,” wali.

¹⁴Tialima, Delailago te Samson tibo po ola mayu, te aga godege mu pialio. Tama agai te Samsongo tobolude te bobage tobolu nisi haliga tiwai elalubo nisi a naga me si te tama selama, tama te masinde bomonama kęnama, tama te medabugo bomonama kęnani. Tialima megi da, Delailago i wali, “Samson, dua dao! Te Filistia dabe asobao!” Tiali goli, aga hodaluama, te tobolu nisi kega sąnama, te dąų walali medabu toga sąnama, te masin me tigidali nai dabe alua peyu toga palio.

¹⁵Tama Delailago agabolo te po wai, “Magi baso nago te po weyu nago ena godolo ebo po obawe? Nago pedauwalidu olo gani bole ebo po naga obao. Nago ena dali te deli homu me ebeo. Megi da, sela sogo nago enabolo te tibo po wabo pogo te ena pomonobo sę elama, tama nago enabolo te nago bomo mena tama pedalubo po te enabolo me wabeo.” Te wego te po wali.

¹⁶Te tigidali sogo te wego po hauwa weyu, tama agaba hanalubo sę yali. Tama tiyu, Samson te pode hagela dwai mu yalio.

¹⁷Te megi da, Samsongo Delailabolo po dolo walali. Agai tama tiwai po wali, “Augwaligo te eno tobolu nisi me togobeo. Te idago ena ame nani sogo, ena te God aga mu dolo bidi pedelali. Te augwaligo eno tobolu nisi togobaso da, teda eno bomo silama, tama ena te gasa bidi dabe tiwai gilama te bomo meni yaibao,” te po wali.