Zazi 16:13-17

¹³Meke zama la koe Samusoni se Dilaela, “Na korapa va evaṉae nau guana tie pekipeki mo goi si rau, meke lopu tozi nau goi sa hinokara. Mu tozi nau sapu vegugua meke kaqu boka pusi igo rina tie si goi,” gua. Meke zama si asa, “Be ikui goi sari ka zuapa ikikue kaluqu, koa keke pitipitiana poko, mamu va nabu nia koa keke pini kalu ṉiṉirana, si kote malohoro gua tugo ri kaiqa tie si rau,” gua si asa.

¹⁴Hitehite va putaia Dilaela se Samusoni, vagi sa sari ka zuapa nana pitipitiana kalu, meke ikui sa sari na kaluna koa keke pitipitiana poko, meke kukili guahe: “Samusoni! Hire sari na tie Pilisitia korapa mae.” Ba vaṉunu si asa meke daku rupahi sari na kaluna pu ta ilupae koasa pitipitiana poko.

¹⁵Ke zama la koe Samusoni se Dilaela, “Nake tataru nau goi, gua si goi, ba lopu evaṉia goi sapu gua asa. Ka ṉeta totoso si ele vata evaṉa guni nau mo goi na tie pekipekiqu meke korapa lopu ele boka tozi nau tugo goi, sapu nasa si va ṉiṉira hola igo si goi?” gua si asa.

¹⁶Meke lopu makudo nanasa la ia sa doduru rane si asa. Ke va duvilia na mabo nia sa sapu gua asa.

¹⁷Ke pa vinabetona si tozi nia mo sa koasa barikaleqe sa hinokara. “Seunae gua sipu podo rau si namu lopu hite ta koto sa kaluqu. Na tava madiqu koe Tamasa pa hahanana tana Naziraiti si rau. Pana ta koto rau si kote taloa sa qua ṉiniraṉira meke kote malohoro gua tugo ri na tie si rau,” gua si asa.