Tukpɔɠaaleʋe Nuiti 15:2-10

²Naa ɠɛni ma: «Gè ɠɛa laani da ga wɔin la è ma, gè fea è-wɔɔlai ya ga anza. Deɠe anzanui la ʋani, é ʋa leʋe tɔun ba ɓaa? Naa zeɠe tɔun potogi zu.»

³Samesɔn ɠɛni ti ma: «Niizu gè la mɔ ɠɛa ga sɔba nu Filiseti nuiti ta-vaa zu, ni nà faa ɲɔu ɠɛɛna ga tiye.»

⁴Samesɔn liini, é koʋe unsaʋagɔ (300) zo, é felefelegiti wɔɔngiti gili ɓɔɠɔ ʋa, é sɔmɔgi ɠili ti-wɔɔn felegɔiti saama.

⁵É abui loni sɔmɔgiti ba, é yeeɓe koʋeiti ba, ti ʋilɛ Filiseti nuiti ta-moloiti su, nii é ga ɓeleegi, ma ɠiliiti ta ma mɔɔiti ti ɠala, ta wolive ɓeleiti.

⁶Filiseti nuiti ti ɠɛni ma: «Ɓɛ ɠa é niima vai ɠɛai?» Ti ɠɛni ti ma: «Samesɔn ʋe, Timena nui nɛkoi, tɔɔzei naa anzai zeɠeʋɛ, é fe bɔɔlai ya ga anza.» Filiseti nuiti ti liini, ti anzanui naa ɠala, ta kɛɛɠɛ.

⁷Samesɔn ɠɛni ti ma: «Zekana wo kɛɛzu la ɓaa? Gè la mɔ looɠoga eyɛsu gè nɔnɔ ʋotokula wo ma.»

⁸É laalɛɛni ti wu, é ti zuloɠani gola. Naa ʋolu, é li é zei Etame pugi zu.

⁹Filiseti nuiti ti liini ti ʋu Zuda yooi zu, ti vaza Leyi ʋele.

¹⁰Zuda nuiti ti gaazaɠagi woni, ti ɠɛ ma: «Lee vaa zu wo lɛai gi laalɔɠɔma?» Ti ɠɛni ti ma: «Gi ʋaaʋɛ ga gi Samesɔn ɠili, gi naa ʋotokula, nii é kɛai ga giye.»