Te Israel Tobolu Bidi Dabe 15:2-10

²Agai Samsonbolo te po wali, “Mu tamao, eno homugo nago aga godolo homu mu isiąwai. Tama tibaso, eno aga te nai uluyu te sogo nage dali hai namu olama bidali bidibolo te we manio. Tiali goli, te aga amanu te sawi gesabi yai mu bidibao. Nago te aga sobaso, te usu yaibao,” wali.

³Tiali goli Samsongo te po wali, “Eno te Filistia dabeba dwai sę ilaibao. Tama eno dwai sę yali po me wagobeo. Te augwa yali kolesagago naga dao!”

⁴Tama tialima, aga pelama, te 300 uni yowi sigi pali. Agai te si si danu kękę pelama, tama nosali agai te sole me deli te kęnani danu side kęani.

⁵Tama agai te sole domonama, tama te uni yowi si si tagala palama, tama augwali udada peyu, te Filistia dabego wit gi tomoba pali. Agai te wit dabe te togai elaluali me, te togosiąwai elaluali wit dabe me te siago ulali. Tama te oliv ni dabe me, te wain ąį nigibo du walobo bono dabe me, te siago dai dao.

⁶Tama te Filistia dabego hanalua biliyu, te tiwai po wali, “Dego te sę yaliwe?” Tama augwaligo po odobadi te po wai, “Samsongo te sę yalio. Magi baso meni, te aga wąį ayago, te Timna bidigo te agai we selama, te aga dali te we sabo sogo nai uluyu te hai namu olama bidali bidi aga abagibolo te we mani,” wali. Tama te Filistia dabe pelama, te we dali aga aya me te aga be dali te siago te augwali dali ulugi pai dao.

⁷Tialima, Samsongo augwaliba te po walai, “Dagego te tiwai kolesaga yali da, agawe? Tialima, eno te tiwai po dąų walobao, te ena polo toma me nogobeo. Hasia bolo eno dagego te yali kolesaga wei ponoma da, tama nosali te ena toma naibao,” wali.

⁸Tama Samsongo augwali dolama, subigila mu elama, tama hauwa bidi mu ela muani. Nosali aga te moni dedage elalubo te masigi ola be me deli elalubo te Etam teba bidigi pai.

⁹Nosali te Filistia dabe aselama, tama te Juda dabego tǫba te bidabo pesage nigagaselama, tama augwaligo te Lehi hanude bidibo bidi dabe dali hwįagasai.

¹⁰Tialima, te Juda dabego augwaliba hanalu wali, “Magi baso te dagego da dali hwįagasaliwe?” Augwaligo te tiwai po wei ponani, “Da asali te dago Samson selama, kalabus ilainu, tama dago te agabolo te agai da dali yali deli tigi poai kolesaga te wei ponainogo te tiwai ilaibao,” wai.