Soukapwüng 15:2-10

²Iwe, semen neminewe a üra, “Üa fokun ekieki pwe ka wesewesen oput neminewe. Iei mine üa apwüpwülüa ngeni chienom. Ifa usun, pwin kükün esap liöch seni? Üa tüngor ngonuk pwe kopwe angei neminewe pwe akasiwilin.”

³Nge Samson a üreniir, “Lon ei otun esap tipisi are üpwe afeiengaua ekewe re Filistia.”

⁴Iei mine Samson a feila o turufi ülüpükü foks, a pwal angei töl. Iwe, a fötifengeni iteiten mechen eman foks ngeni mechen eman o iseis efoch töl lefiler.

⁵Nge lupwen a keni ekewe töl, a asüela ekewe foks pwe repwe süla lon än ekewe chon Filistia tanipin wiich resamwo pöküpök, pwe ekewe pilükün wiich me ewe wiich esamwo pöküpök ra karala, pwal ekewe tanipin olif.

⁶Mürin, ekewe chon Filistia ra ais, “Iö a föri ei?” Nge ra pälüeni, “Samson, pwülüen nöün ewe re Timna, pun ra angei seni pwülüan we o apwüpwülüa ngeni chienan.” Iei mine ekewe re Filistia ra feito o kenala ewe fefin me saman we.

⁷Samson a üreniir, “Ika iei usun mine oua föri, üpwe pwon fän akapel pwe üsap ükütiu le afeiengauakemi tori üpwe wes le ngenikemi chappen ämi föför.”

⁸Iwe, a fokun fiu ngeniir fän song o niela chomong. Mürin, a feitiu o nonom lon pwangen ewe achau lon Etam.

⁹Mürin, ekewe chon Filistia ra feila, ra tolong lon ewe fanü Juta o maun ngeni ewe telinimw Lehi.

¹⁰Nge ekewe re Juta ra aisiniir, “Pwota oua feito pwe oupwe maun ngenikem?” Iwe, ra pälüeni, “Äm aia feito pwe aipwe föti Samson o föri ngeni usun mine i a föri ngenikem.”