JUECES 15:2-10

²huan quiijto: ―Na nimoilhui ya tijcajtejtoya huan yeca nijmactili mohuampo. Pero nijpixtoc seyoc noichpoca cati más pisiltzi. ¿Amo tiquita más yejyectzi? Huajca ya ximocuili quej ipataca.

³Huan Sansón quiijto: ―Ayecmo aqui huelis techtajtacoltis ica cati fiero nimechchihuilis anfilisteos, pampa amo cuali antechchihuilijtoque.

⁴Huan Sansón yajqui huan quinitzqui 300 cayochime huan quincuitapililpi ojome cayochime huan tatajco ten sese ome inincuitapilhua quinilpili se ticuahuit.

⁵Teipa quitati nopa ticuahuit huan quinmajcajqui nopa cayochime ma motalojtiyaca campa inintatoc nopa filisteos. Quej nopa tami tatac nopa trigo cati noja moquetztoya huan cati ya quitectoyaj ipan inimil. Nojquiya tatac inixocomeca mil huan nochi inincua ten olivo. Nochi cati quitoctoyaj tatac.

⁶Huan nopa filisteos quiijtojque: ―¿Ajquiya quichijqui ya ni? Huan tananquilijque: ―Sansón quichijqui, yaya cati imontica nopa tacat cati ehua altepet Timnat pampa quiquixtili isihua huan quimactili cati inelhuampo ipan nopa nenamictili. Huan nopa filisteos hualajque huan quitatijque nopa sihuat ihuaya itata.

⁷Huan quema Sansón quimatqui cati quichijque nopa filisteos, quinilhui: ―Pampa anquichijque ya nopa, ama amo nimosiyajquetzas hasta nimechtzontamiltis.

⁸Huan quintamimicti nochi filisteos nopona huan amo quintasojtac. Teipa yajqui para itztoti nechca tepet Etam campa onca se ostot ipan tet.

⁹Huan nopa filisteos yajque mochihuatoj ipan tali Judá nechca altepet Lehi.

¹⁰Huan tali Judá ehuani quintatzintoquilijque: ―¿Para ten anhualahuij nica? Huan nopa filisteos tananquilijque: ―Tihualahuij tiquitzquiquij Sansón para tijcuepilise por cati techchihuilijtoc.