Tjaanakuṉu 1:12-24

¹²kanya yaṉangu kutjupa tjuṯangkuya palumpa wangka kulira palumpa walytjarringu. Paluru watjaṉu, “Tjana ngayuku walytjarringkula yilta Katutjaku walytja tjuṯalpi nyinanyi, palumpa yuṉṯalpa tjuṯa palumpa katja tjuṯaṯarra.”

¹³Katutjalu ngangkari tiṉatjarrangku wangkarra tjananya palumpa katja yuṉṯalpa nyinatjunkupayi, paluru tjananya ngulytjuṉu. Katutjanya wiya yaṉangu nguwanpa katjarringkupayi yuṉṯalarripayi.

¹⁴Katutjaku wangka tjakultjunkupayi paluru mantakutu ngalya yankula yiṯirringkula yaṉangurringu. Yaṉangu tjuṯawana nganaṉalawana paluru nyinangi. Paluru yaḻṯurunytjulampa nyinapayi, Katutjanya nguwanpa. Paluru Katutjaku wangka palya nganaṉanya nintilpayi. Nganaṉatju kuliṉingi yalatji, “Yilta paluru paapa Katutjaku katja nyinanyi, kutjupa wiya Katutjakuṉu walytjara nyinanyi.”

¹⁵Tjaanalu Katutjaku katja palunya kulira tjanala raapangku watjaṉu yalatji, “Yala ngaatja ngaranyi. Panyapa ngayulu nyurrangarrinya watjaṉu yalatji, ‘Mayutju tiṉa ngalya yanku, ngayulu Katutjaku wangka nintira wiyarrinytjala ngaṉṯi. Ngayulu mayutjuwiya nyinanyi paluru mayutju tiṉalampa nyinaku. Ngayulu nyinanytjawiyangka paluru yirriṯi kutu nyinangitja.’”

¹⁶Mayutju paluru yaḻṯurunytjungkulanya yaṉṯayaṉṯara kutu kanyiṉingi, wantinytjawiyangku.

¹⁷Yirriṯi Katutjalu palumpa luwu Muutjanya yungu. Muutjanya yilta mayutju palya nyinapayi. Muutjala wirriḻi Yiitju Kurayitjanya nyinanyi. Palulawana nganaṉa nyinarra kuliṉi yalatji, “Yiitjunya palyalingku nyinanyi. Palurulanya nintintjala nganaṉa Katutjaku wangka yuti kuliṉi. Katutjanya yiltalampa yaḻṯurunytju nyinanyi.”

¹⁸Yaṉangungku wiya Katutjanya kurungku nyakupayi, Katutjanya yarrkayi nyinanyi. Palumpa katja Katutjala tjungu nyinarra nganaṉanya palumpa paapa yutitjananyilampa. Paluru kutjarra mayutju tiṉa kutjarra nyinanyi.

¹⁹Tjaana paluru yaṉangu tjuṯa ngurra Piitjaniyila kapingka tjarrpatjunkula papatatjimilaṉingi. Ngurra paluru ngarangi karru Tjuutanangka kakarrara. Tjuwu tjuṯaku mayutju tjuṯa Tjarutjalumangka nyinangi. Paluru tjana waarrkana tjuṯa Tjaanalakutu wantirriyaṉu. Waarrkana paluru tjana tuḻkuku mayutju tjuṯa nyinangi, kutjupa tjuṯaya tjaatji tiṉangka waarrkarringkupayi, kutjupa tjuṯaya Paratji tjuṯa nyinangi. Paluru tjana yankula Tjaananya tjapiṉu, “Tjinguru nyuntu Kurayitjanyampan nyinanyi?, Katutjalu watjara iyaṉutja.”

²⁰Tjaanalu tjananya tjukarurrungku watjaṉu, “Kurayitjanya wiyaṉa nyinanyi.”

²¹Tjana palunya watjaṉu, “Nyuntu ngunytji yini Tjaananya, kurrunkurrunpa nyinanyi. Nyuntu tjinguru Yilaatjanya kanarringu, yaṉangu palunya yirriṯitja.” Tjaanalu tjananya watjaṉu, “Ngayulu wiya Yilaatjanya.” Tjana piyuku Tjaananya watjaṉu, “Yaṉangu yirriṯitja kurrunkurrunpa palunya tjinguru nyuntu Katutjaku wangka watjalpayi palunya nyinanyi kanarringkula. Paluru tjananya palyangku Katutjaku wangka tjakultjunkupayi.” Piyuku tjananya Tjaanalu wiya watjaṉu.

²²Tjana piyuku Tjaananya tjapiṉu, “Nyaaku nyuntu yaṉangu tjuṯa nintilpayi?, ingkaṯa nguwanpangku, nganalunta watjaṉutjangka? Watjalalanyatju!, mayutju tjuṯakutulatju yankula tjakultjunkunytjaku.”

²³Tjaanalu tjananya watjaṉu Yaatjayalu irriṯi watjaṉutja yalatji, “Ngayuluṉa ngurra kapiwiyawanangka yaṉangu tjuṯa tjakultjurinkupayi yalatji, ‘Yiwarra tjukarurruwanaya nyinama!, mayutju tiṉa nyurrangarrimpa ngalya yananyingka.’”

²⁴Paluru tjana Paratji tjuṯangku tjapiṉu, “Nyuntukunyu wiya Katutjalu watjara iyaṉutja, wiyan Yilaatjanya. Wiyakunyu nyuntu Katutjaku wangka watjalpayi. Nyaaku tjananyan nyuntu yaṉangu tjuṯa kapingka tjarrpatjunkula papatatjimilalpayi?”