San Juan 1:12-24

¹²Weyan weyanla mantimini yaca tennato yabe cayailainue. Junni yalaca Diosichi nalala ino podeisa mantá cuwanue.

¹³Junni Diosichi nalala inori uyan quiraque joe. Tsachi nalala nainun cuwenta itoe. Diosi patsa yachi nalala suwamin joe.

¹⁴Junni ya “Diosichi Fiqui” tinun jominnan tsachi inue. Tsachi ito, chiquilabe pesonnaminue. Duque laquirato, tsarasica pamin jominue. Apa Diosichi mancari Nao joto, duque mantá tan jominue. Junni tsan jominca chiquilari quiralaquiyoe.

¹⁵Junni Juanni yaca quirato cuenta quee. Sonba pato, itsantie: —Nulabe cuenta quinato, laca fe mantá tan tsachica cuenta quicayoe. ¿Yari laca caquenan jominue tituan? tie. ¿Junto lachi benechi jatonan, laca fe jochunae tituan? tie. Junni la tsantica jun tsachiri Jesús joe tie. Juanni Jesuca tsanque cuenta quee.

¹⁶Junto Jesuri tsaracari sen joto, jeralelabenan sen joe. Chiquilaca duque laquiramin joto, chiquilabe nantanancari seide seide jimin joe.

¹⁷Jana Moisés matu mate Diosichi mantaca micarinatonan, Diosi tsaracari laquiraequeri patunue. Jesucrístori junca pae. Yari tsarasica pamin joto, Diosi laquiraeque pae.

¹⁸Uyanlari Diosica natiya quiralaquitue. Yachi mancari Nao mantimini yabe man parejo chumin joto yaca micuwae.

¹⁹Junni israelítalari Juanbe panhabi Jerusalenbi nechi jalaie. Patelelabe yalachi lebita tinun ayudaiminlabe jalaie. Yala israelita mantaminla mantaca junla jato, ¿Moyun? tilatie.

²⁰Junni Juannan tsaracari tuca pato, itsantie: —Diosi wenteca jun Cristo tinun tsachi itoyoe tie.

²¹Junni Juan tsantinunsi, ya itotori, ¿matu to Elíayun? tilatie. Juanni yanan itoyoe tie. Junni yala jaca junlari mannan manpanhalaquee: —Diosichi mantate pamin tsachi jano jominue. ¿Yayun? tilatie. Junni Juanni te, yanan itoyoe tie.

²²Junni Juan tsantinan, israelítala manan manpato itsanlatie: —Mo jototiya paniquede! tilatie chiquilaca ereminlabe mo jonunca manpalaquichun. ¿Mo joyoe tiyun? latie.

²³Junni Juanni itsantie: —Matu to Isaías Diosichi mantate pila chuteto, laca panue. Niyanlanantiya chutunun postote tsachi manca sonba pato payimin jochunaeque chuteca joe tie. Miya jano jonun tenchi jera manseilainade! tichunaeque chuteca joe tie. Junni lari ya tsachi joyoe tie.

²⁴Aman Juánchica jaminla weyanlari fariseo tinun bolon jominlanue.