Jon 1:12-24

¹²Sen bia diet ing diet ga bale halaka leh ie, ga haut se tar diet bia diet naga nati God. Diet at kaike ing diet ga nurnur tana.

¹³Pa di ga kaha diet hoira tinahuat ta ira tunotuno, bia ta ira sinisip gar na tunaan mon. Iesen taie. Diet tahuat laah ta God.

¹⁴Ma no Nianga ga tunotuno um, ma ga lon nalamin ta mehet. Ma mehet ga nas no uno minamar, a minamar gar na halhaliana bulukasa meram ta nana Sus. Ma ga hung ma no harmarsai ma ga hapuasne bakut mah ira tutun ta God.

¹⁵Io, Jon ga hinhinawas palai utana ma ra dadas hoken: “Iakan iau ga hinhinawase muat utana. Iau ga tangtange, ‘A tutun bia i hanuat menamur tagu iesen i tamat at tagu kanong pa di ga kaha baak iau, ma iakana iaat.’”

¹⁶Ma i hung taar ma no harmarsai, kaik gi la tamtabar haitne dahat bakut me.

¹⁷Io, God ga tar ira harkurai uta dahat tane Moses, iesen ga tar no harmarsai ma no palpalai ta ira tutun utana at ukai ho dahat tane Jisas Krais.

¹⁸Taie tikai pai nas baak God. Iesen God no bulukasa i la kis pirap taar at nana Sus. Ma aie at gate hinawas hapalaine dahat utana.

¹⁹Io, no hinhinawas palai tane Jon utane Jisas hoken. Ira tamat ta ira Iudeia kaia Ierusalem, diet ga tule ari a ut na pakila lotu ma ari tano hun tane Lewi ing diet la harharahut ta ira pinapalim na lotu ukaia hone Jon. Ma diet ga me tiri ie bia a mangana tunotuno sa ie.

²⁰Jon pa ga malok bia na balu diet, iesen ga hinawase hapalaine at mon diet, gaam tange bia, “Taie bia iau no Mesaia.”

²¹Diet ga tiri habalin ie, “Ma sige um ugu? Ne Elaija ugu?” Jon ga balu diet, “Taie, iau pai Elaija.” Diet ga tiri habalin ie, “Augu no tangesot?” Ga balu habalin at diet ma ga tange, “Taie.”

²²Io, diet ga tange tana, “Kaia, nu hinawase um mehet bia sige tun at ugu, waing mehet naga hinawase diet ing diet tule mehet ukai. Nu tange hohe wara utaam?”

²³Jon ga balu diet ma ira nianga tano tangesot Aisaia hoken: “Iau no ingana i taatau meram ra hanuo bia, ‘Gil hatakodasne no ngaas tano Watong wara uno hinanhuat.’”

²⁴Io, ari Parisi ing di ga tule, diet ga tiri Jon hoken: “Bia pai no Mesaia ugu, ma taie bia ne Elaija ugu ma taie bia no Tangesot ugu, u la baptais wara biha?”