Yohanis 1:12-24

¹²Leo mae talo naa, tehuu basa hatahorir mana simbok ma ramahere neun, Ana fee sara haak fo dadi reu Manetualain anan nara.

¹³Naa, sama leo sira neni bonggi seluk kara ena. Tehuu sira neni bonggi beun nara raa, ta sama leo hatahori bonggi kakana ana. Ma ta numa touk esa hihiin mai, fo hambu tititi-nonosik. Te ara dadi reu Manetualain anan nara, nahuu Manetualain ndia fee sara masoda beuk naa.

¹⁴De ‘Manetualain Dedeꞌa-kokolan’ naa oo, neni bonggik dadi neu hatahori dae-bafok boe. Ana nasoda nai ita taladan. Ita mete-tita Ndia ta neni babanggan. Ndia ta neni babanggak talo naa, nahuu Ndia naa, Manetualain Ana kise muꞌen. Ana hii natudu Ndia dale susuen neu ita, nahuu Ndia hada-tataon memak leo naak. Ma basa hata fo Ana kokolak laꞌe-neu Manetualain, memak tetebes.

¹⁵Yohanis naa, nafada laꞌe-neu Hatahori ia. Ana eki nae, “Nenene, ee! Ndia ia, ndia au tuik ena ae, ‘Neu ko Hatahori esa nae mai. Ndia naa, ta neni babanggak lena heni au. Au bei ta neni bonggik, te Ana nakahuluk ena na!’ ”

¹⁶Yohanis kokolak talo naa, nahuu Hatahori naa hii nalan seli natudu Ndia dale susuen. Ma Ana tao laꞌi-laꞌik kana talo naa nakandoo fee ita basa ngga.

¹⁷Lele uluk, baꞌi Musa ndia nakonda Manetualain Hohoro-lalanen neu ita bei-baꞌin nara. Tehuu hatematak ia Hatahori naa, ndia Yesus Karistus, ndia natudu Manetualain dale susuen neu ita. Ma basa hata fo Ana kokolak laꞌe-neu Manetualain, memak tetebes.

¹⁸Ta hambu tita hatahori esa boe na, mete-nita tetebes Manetualain. Tehuu Ndia Ana kise muꞌen fo Ana suek naa, ndia natudu ita Manetualain dalen ena. Kanak naa, hambun nai Ndia Aman boboan. Huu Ndia oo ndia Manetualain boe.

¹⁹Laꞌe esa, hatahori Yahudi malanggan nara marai Yerusalem radenu malangga anggama hida, ma hatahori hida ruma leo Lewi fo mana rasiꞌe raono-lalau nai Manetualain Uma Huhule-haradoi Ina-huun mai. Ara reni lee Yarden boboan seri reu, fo ratane Yohanis Mana Saranik rae, “O ia, Karistus fo Manetualain helu-bartaa ena nae nadenun mai, do?” Boe ma ana nafada sara nae, ndia naa, see.

²⁰Ana manaku no ledo-ledo nae, “Taa. Karistus ta ndia au.”

²¹Boe ma ara ratane seluk bali rae, “Mete ma talo naa, o ia, see? Baꞌi Elia, do?” Ana naselu nae, “Taa boe.” Ara ratane rakandoo bali rae, “Boso losak o ia, Manetualain mana toꞌu dedeꞌan laen, do?” Ana naselu nae, “Taa boe.”

²²Basa boe ma ara ratane bali rae, “Mete ma talo naa, o ia, see? Mafada dei! Huu ai muste fali miu mafada malanggan nara mana madenu ai. Tulun, dei!”

²³Boe ma ana kokolak tungga hata fo baꞌi Yesaya surak nita nae, “Au ia, ndia hatahori mana bolu nai mamana nees nae, ‘Basa hatahorir sadia tao neulau dalak kara, fo simbok Lamatuak mamain! Tao matetu dalak kara fo soru Ndia.’ ”

²⁴Nai hatahorir maruma Yerusalem mai taladan nara raa, hambu hatahori hida oo ruma partei anggama Farisi mai boe.