Tinata Valavalar 28:2-26

²Ba ta gunan i varvarpiam mangoro dia varvarkia ta ra kiki na luluai; Ma ba ra tarai dia matoto ma dia kabinana a gunan na tur bulu.

³Ba tikai i ki na niiba ma i ki taun ra umana luveana, I da ra bata tonoi nina i lovon vue ra magit na nian par.

⁴Diat dia vana kan ra varkurai dia pite pa ra umana tena varpiam, Ma ga diat dia torom ta ra varkurai dia tur bat diat.

⁵A varkurai pa i kapa pire ra kaina tarai, Ma ga diat dia tikan upi ra Luluai a lavur magit i kapa pire diat.

⁶A luveana ba i dovot kana mangamangana I boina ta dir ma ra uviana nina ba i gegagege kana nga.

⁷Nina i toratorom ta ra varkurai a kabinana na bul nam, Ma ga nina dia talaina ma ra umana lukai i varuva tamana.

⁸Nina i vapealane kana tabarikik mar ra ngala na tinavua ma ra varvaur, I varurue ke upi kai nina i mari ra umana luveana.

⁹Nina i lingan kan ra varkurai ma pa i valongore, Kana niaring bula a magit na milmilikuan.

¹⁰Nina i varara ra tena takodo upi na mur ra kaina nga, Na bura ta kana ubu iat; Ma ga ra ko na tutana na kale pa ra bo na magit.

¹¹A uviana i malamala tena kabinana, Ma ga ra luveana nina i kapa ra nuknukina i nunure kana mangamangana.

¹²Ba ra umana tena takodo dia ongor, i ngala tuna ra minamar; Ma ba ra umana tena varpiam dia tut, a tarai dia paraparau.

¹³Nina i tuba kana umana nirara pa na tavua, Ma da ga mari ka nina i tata kapa ure ma i vung vue.

¹⁴I ti doan nam ra tutana ba i ru vatikene ra Luluai, Ma ga nina i valeo ra balana na ki na malari boko.

¹⁵Da ra leon i kukukula, ma da ra bear i rovoi upi ra ana magit, Damana ra kaina luluai pire ra umana luveana.

¹⁶A luluai nina i iba upi ra minatoto i kabila ki taun ra tarai; Ma ga nina i milikuane ra mangamangana vakatip na valolokon kana nilaun.

¹⁷Ra tutana ba i ga ubu doko ta tikai, Boina ba na puiap tuk tar ta ra bung na minat; Koko ta tikai na maravut ia.

¹⁸Nina ba i dovot kana vinavana da valaun ia, Ma ga nina i gegagege kana mangamangana na bura muka.

¹⁹Nina i palum kana uma na vatur vake ra ngala na magit na nian, Ma ga nina i mur ra mangamangana vakuku na ki na niiba tuna.

²⁰A dovot na tutana na ti doan tuna, Ma ga nina i ngarangarao upi na uviana pa na pila ta ra varkurai.

²¹Pa i boina ba da ru vakuku ra tarai; Tago ta tikai na pait ra varpiam ure ra ngungu magit na nian ika.

²²Nina ba i varngu i ngarangarao upi ra peal tabarikik, Ma pa i nunure ba ra kini na niiba na tadav ia.

²³Nina i pit ta tikai da manane boko namur, Ma pa da manane nina i pite varpa vavaongo.

²⁴Nina i long ra magit kai tamana ba nana ma i biti ba pa i kaina, Dir talaina ma ra tena varli.

²⁵A tena rorogoto i vuna ta ra varngangar, Ma ga nina i nurnur tai ra Luluai na tubu boko.

²⁶Nina ba i nurnur ta ra nuknukina iat i lunga; Ma ga nina ba i vanavana ma ra kabinana da valaun ia.