Proverbs 28:2-26

²Ali sor bo ko kariimet nunga supuling nongorak tagi gurungumusan ale nunumi pagorsan mu te supuling iru iru aratasan; bare ikia nunguning se ikia ningo ko kari mu kariimet munan te la nunga bitarso se ningo la bagasan.

³Kari supuling bo kariimet kituwura nunga bita maguwuso mu, tuwik ikup biya sokel karogo kaposo ale inang sarumu warso wore iwita.

⁴Kariimet munan den nubiring tusan, mu nuna kari memek nungumik ko bala ningo balsan; bare awiriya munan den karo tusan, mu nuna kariimet memek nunga memek ko sokel karogo kapasan.

⁵Kariimet memek bitawara mu nuna munan diram la betera ko nunguning me ikisan; bare kariimet Yawe karo tui lagasan mu ninguru ko ikisan.

⁶Kituwura baga se kimik den mena mu yawarakala; mel suen biya ago baga se diram la me karo tua mu memek.

⁷Kuriang munan den karo tuso, mu kuriang ikia sinar ago; bare kuriang kariimet ngual kasik lagasan mu nongorak numi giso, mu nu nuet gomang motam ikup tuso.

⁸Awiriya manga biya te taukko ko marir manga kalel biya beteso ale taso, bare ko memek mu koma, ko manga mu geragoso ale kari bo munan ningo karogo mu kote namoso, se nu kariimet kituwura te nunga sangarso.

⁹Awiriya munan den me karo tuso, mu Yawe noko guranek mu biriruwuso.

¹⁰Awiriya kari te iluwokko mutim i beteso ale kari diram umu kulurso te ilak namoso, mu kota ningi daguloso; bare awiriya kumik den mena mu koma yawara taukko.

¹¹Kari kumik mel suen biya karogo mu kota numi ikiso mu nu ikia biya karogo iwita ikiso; bare kari kituwura ikia sinar ago mu kari mu ninguru ari kutuwuso.

¹²Tom kari ningo diram mu nama sanamasan, mu amilmil biya kaposo; bare tom kari memek alo nama sanamasan mu kariimet nama yumu gilingisan.

¹³Awiriya ko memek duap saguwuso, mu molak me maiso; bare awiriya ko memek duap balso ale giris palagoso, mu ko memek mu mena namoso se ningo la lagoso.

¹⁴Awiriya Yawe bowa ningi baga lagoso, mu amilmilarukko; bare awiriya gomang motam aora biya mu ikup arigokko.

¹⁵Kari supuling ko kiwem memek, mu ko kariimet nunga bita maguwuso se nungumik saonga mena; mu ko ariga lion memek niawoso agi bear daong ko geragawoso mu iwita.

¹⁶Kari supuling kawel munan te se ko sokel te kariimet nongote melmasak giso mu nu kumik ikia ningo bo mena; bare kari supuling lage memek te mel gia mu ko me kueso mu tom maiya biya ningo la bagarukko.

¹⁷Awiriya bo moram se kueram mu butata ikia moa lagaruk se yumu geraga laga kua namarukko; kariimet bo nu me ta sangukko.

¹⁸Awiriya ko bagara aolak diram la mu ningo la lagoso; bare awiriya ko munan daeldel mu tairate maga namarukko.

¹⁹Awiriya ko ali te kuting gege naguso, mu nu na inang mel terong la kapa tuso; bare awiriya ikia kawel karo karo bola pala lagara, mu nu kumik mel mena, kituwura lagarukko.

²⁰Kari awiriya munan diram karo tuso, mu marak ningo suen la karogo terong bagarukko; bare awiriya mel suen biya gemarukko gomang ani lagoso, mu memek taukko.

²¹Ikup guyak ariga kam te, nanimi nangama ko nguangara ale kawel te nanimi saonga mu kiwem memek; bare kariimet sang bread biling te tamonko kiwem umu bita gilingisan.

²²Kari ko mel suen la ko igek se mel suen biya gemarukko gomang ani lagoso, mu kumik mel mena kituwura bagarukko tom kulukumu iram mu me ari ikiso.

²³Awiriya bo ko memek kasurso, mu maingte amilmil biya taukko; bare awiriya den kawel te kari gomang naso, mu maingte nup memek taukko.

²⁴Awiriya nuamnuet nunga kulurso ale nongote melmasak giso, ale numi por kaloso ale balso, “Munan mu ningi memek bo mena,” maso, mu nu memek ko memek aromemek beteso.

²⁵Kari mel suen biya ko igek, mu ko munan mu te ining singi kager tagi kariimet ningi beteso; bare awiriya Yawe te la ira sanami lagoso mu ningo la baga lagarukko.

²⁶Kari kota ko ikia te la ira sanami lagoso, mu kari ngualara; bare awiriya ikia sinar ko munan te lagoso mu memek bo me arigiso.