Sudcengero 11:10-37

¹⁰“Mi el o RAJ maškar amende švedkos,” phende leske o vodci, “amen das tut lav, hoj keraha sa avke, sar phenďal.”

¹¹Avke geľa o Jeftah le Gileadoskere vodcenca a o manuša les ačhade vaš peskero vodcas the veľiťeľis. Andro foros Micpa o Jeftah phenďa anglo RAJ savoro, so imar phenďa le vodcenge.

¹²Paľis o Jeftah bičhaďa le muršen ko Ammoniko kraľis, hoj leske te phenen: “So tut hin pre mande, hoj avľal pro mariben andre miri phuv?”

¹³O Ammoniko kraľis phenďa le Jeftoskere muršenge: “Sar o Izraeliti avenas avri andral o Egipt, zaile miri phuv le paňestar Arnon dži ko paňi Jabbok the ko Jordan. Akana de mange oda pale andro smirom!”

¹⁴Avke o Jeftah pale bičhaďa le muršen ko Ammoniko kraľis

¹⁵a diňa leske te phenel: “Kavke phenel o Jeftah: O Izrael na iľa le Ammončanenge aňi le Moabčanenge lengeri phuv.

¹⁶Sar džanas o Izraeliti avri andral o Egipt prekal e pušťa ko Lolo Moros a doavľa andro Kadeš,

¹⁷o Izraeliti bičhade ko kraľis andral o Edom le muršen, hoj leske te phenen: ‘Kamľomas te predžal prekal tiri phuv.’ Ale o Edomiko kraľis pal kada na kamľa aňi te šunel. The ko Moabiko kraľis bičhade le muršen, ale aňi ov lenge oda na domukľa. Vašoda o Izraeliti ačhile andro Kadeš.

¹⁸Paľis o Izraeliti džanas prekal e pušťa a obgele e Moabiko the Edomiko phuv. Doavle pre vichodno sera la Moabika phuvatar a kerde peske taboris pal o paňi Arnon. Ale na pregele odarik, bo ode chudelas e phuv Moab.

¹⁹Paľis o Izraeliti bičhade le muršen ko Amorejiko kraľis ko Sichon andro Chešbon a pomangľa les: ‘Kamľomas te predžal prekal tiri phuv andre amari!’

²⁰Ale o Sichon na pačalas oleske, hoj o Izraeliti kamen ča avke te predžal prekal leskeri phuv. Vičinďa ke peste savore peskere muršen, kerďa taboris andre Jahca a geľa pro mariben pro Izraeliti.

²¹Ale o RAJ, o Del le Izraeloskero, diňa le kraľis Sichon leskere manušenca andro vasta le Izraelitenge. Avke o Izraeliti upral leste ňerinde (zviťazinde) a zaile caľi phuv le Amorejengeri, save ode bešenas.

²²Zaile caľi phuv le Amorejengeri le paňestar Arnon dži ko paňi Jabbok the la pušťatar dži ko Jordan.

²³O RAJ, o Del le Izraeloskero, iľa e phuv le Amorejendar a diňa la le Izraelitenge a tu kames odi phuv te zalel?

²⁴Či tuke na leha oda, so tuke dela tiro del o Kemoš? Ale amen peske zalaha savoro, so amenge o RAJ, amaro Del, imar diňa.

²⁵Či sal feder sar o Moabiko kraľis o Balak, o čhavo le Cipporoskero? Či pes vesekedinďa le Izraeloha, abo geľa leha pro mariben?

²⁶O Izraeliti bešen imar trin šel (300) berš andro foros Chešbon the andro Aroer, andre lengere gava the mek andre savore fori pal o soduj seri le paňestar Arnon. Soske lenge kala fori akorestar na iľan?

²⁷Me tuke na kerďom ňič nalačho, ale tu mange keres namištes, te aves pre ma pro mariben. O RAJ hin o sudcas. Ov adadžives mi sikavel maškar o Izraeliti the Ammončana, kaskero hin o čačipen.”

²⁸Ale o Ammoniko kraľis na kamľa aňi oda te šunel, so leske diňa te phenel.

²⁹Le RAJESKERO Duchos avľa pro Jeftah a ov pregeľa prekal o phuva Gilead the Menašše andre Gileadiko Micpa. Odarik geľa pro mariben pro Ammončana.

³⁰O Jeftah diňa vera le RAJES: “Te mange čačes deha le Ammončanen andro vasta

³¹a te man lendar visarava pale andro smirom, akor dava le RAJESKE sar labarďi obeta oles, ko avela ešeb (peršo) angle mande andral o vudar mire khereskero.”

³²Paľis o Jeftah geľa pro mariben pro Ammončana a o RAJ leske len diňa andro vasta.

³³Domarďa biš (20) fori le Aroerostar dži paš o Minnit the dži ko Abel-Keramim. Igen but le Ammončanendar murdarďa a avke ňerinďa (zviťazinďa) upral lende.

³⁴Sar o Jeftah avelas pale khere andre Micpa, leskeri čhaj avľa avri anglal leste le kheľibnaha the bašavibnaha pre tamburina. Sas les ča jekh čhajori, na sas les ňisave aver čhave.

³⁵Soča la dikhľa, čhingerďa pre peste o plašťos a zvičinďa: “Ó, čhajori miri, prekal tute hin miro jilo dukhado! Anďal man andre bari bibach! Diňom vera le RAJES a mušinav oda te doľikerel!”

³⁶Oj leske phenďa: “Dado miro, te diňal le RAJES vera, akor ker manca ča avke, sar phenďal. Se o RAJ tuke diňa, hoj te visares pale tire ňeprijaťeľenge le Ammončanenge.”

³⁷Paľis mek phenďa le dadeske: “Ker prekal ma kada: Muk man duj čhon, hoj te džav mire prijaťeľkenca pro verchi. Ode rovaha upral oda, hoj šoha (ňikda) na džava romeste.”