Zatù 11:10-37

¹⁰Ne midtavak dan te, “Uya, iyan ka edhimuwen dey he pengulu. Ne iyan ebpeketistiǥus kayi is Nengazen.”

¹¹Umbe, miduma si Jefta kandan, ne midhimu sikandin te menge tig-Gilead he pengulu wey peremandar zan. Ne ziyà te Mizpa, nenangdù si Jefta ziyà te etuvangan te Nengazen dutun te kedawata zin te ketengdanen he kebpengulu.

¹²Ne midsuǥù ni Jefta is menge menunudtulà te kebpenginginsà diyà te hadì te menge Amunihanen ke maan is edsurungen dan is Israel.

¹³Ne iyan heini tavak duen te hadì te menge Amunihanen diyà te menunudtulà he midsuǥù ni Jefta: “Hein ked-awà te menge Israilihanen puun te Ehipto, mid-aǥew zan is tanè dey–puun te Wahig he Arnon taman te Wahig he Jabok, wey pehendiyè en te Wahig he Jordan. Ne iyan suat dey he iulì niw heini ziyà te kenami te melinawen he paaǥi.”

¹⁴Ne mid-uman en maan medsuǥù si Jefta te menge menunudtulà diyà te hadì te menge Amunihanen

¹⁵su wey zan mekaǥi heini he menge lalag, “Wazè eǥawa te menge Israilihanen is tanà diyà te Moab etawa tanà diyà te Ammon.

¹⁶Hein ebpuun diyà te Ehipto is menge kepuun dey, mibayè dan diyà te sibsivayan pehendiyà te Zaǥat he Meriǥà taman te nekeuma zan diyà te Kadesh.

¹⁷Ne zuen midsuǥù dan he impehendiyà te hadì te Edom su edhangyù dan he ipevayà sikandan diyà te Edom, iyan, wazà sikandan tuǥuti. Ne iring din ded daan dutun is mid-ulaula te hadì diyà te Moab diyà te kandan. Umbe malù neuǥet is ked-ubpèubpè dan diyà te Kadesh.

¹⁸“Dutun te huziyan he timpu, midlaus sikandan medhipanew ziyà te sibsivayan. Midliǥuy sikandan diyà te Edom wey Moab taman te nekeuma sikandan diyà te zapit te edsilaan he vahin te Moab he veyvey te Wahig he Arnon. Dutun sikandan megkampu, iyan, wazà sikandan medlayun te Arnon su dulunà haazà te Moab.

¹⁹“Ne zutun duen midsuǥù dan he menge menunudtulà diyà te Heshbon, diyà te ki Sihon he hadì te menge Amorihanen su edhengyuan dan sikandin he tuǥuti zin sikandan te kebayà diyà te tanè din su para mekeuma sikandan diyà te ebpeveyaan dan.

²⁰Iyan, wazà medsarig kandan si Sihon. Kekenà, midtiǥum din diyà te Jahaz is menge sundaru zin ne midsurung dan is menge Israilihanen.

²¹Piru mibpengelinteuwan te Nengazen he Megbevayà te Israel he mezaag sikandan te menge Israilihanen. Umbe migkuwa te menge Israilihanen is langun he tanà te menge Amorihanen he ebpemen-ubpà dutun he lugar:

²²puun te Arnon taman te Jabok, wey puun te sibsivayan taman te Wahig he Jordan.

²³“Umbe iyan midsegseg te menge Amorihanen is Nengazen he Megbevayà te Israel, ne imbeǥey zin is tanè dan diyà te menge Israilihanen. Ne ǥuntaan edkesuatan niw te egkuwa heini?

²⁴Iyan niw engkena is tanà he ibeǥey keniyu te ed-ezapen niw he si Kemosh. Su sikami, ed-engkenen dey is langun he ibeǥey kenami te Nengazen he Megbevayè dey.

²⁵Edhuna ke ve ki Hadì Balak te hadì he Moab, he anak ni Zipor? Wazà sikandin keenu mebpekidtebek te Israel. Kenè be?

²⁶Menge 300 en he tuig is ked-ubpè te menge Israilihanen diyà te Heshbon wey Aroer, wey ziyà te menge inged he nekeelingkus kayi he menge lugar, ragkes en is menge inged diyà te kilid te Wahig he Arnon. Maan is guntaan kew en metanud te kegkuwa kayi?

²⁷Wazà mezaat he mibeelan dey ziyà te keniyu, piru sikiyu mezaat is ed-ul-ulahan niw kenami su egkesuat kew he ebpekidtebek kenami. Iyan is Nengazen edhukum kenitew ke hentei is ebpekevenar kenitew.”

²⁸Piru wazà seǥipaa te hadì te menge Amunihanen haazà is menge lalag he impeuwit ni Jefta.

²⁹Dutun he timpu mid-ulinan si Jefta te Mulin-ulin te Nengazen. Mid-eneb din beyai is tivuuk he Gilead wey is Manase, pehendiyà te Mizpa diyà te Gilead. Ne puun te Mizpa midsurung din is menge Amunihanen.

³⁰Ne mibpenengduan ni Jefta is Nengazen. Ke sikandin te, “Emun idtuǥut nu he mezaag ku is menge Amunihanen,

³¹ibpemuhat ku ziyà te kenikew he pemuhat he edtutungen is egkehuna he egawas diyà te valey ku te kedsinuǥung kedì dutun te ked-ulì ku puun te tebek.”

³²Nekidtebek si Jefta te menge Amunihanen, ne mibpengelinteuwan te Nengazen he mekezaag sikandin.

³³Nezaag dan is menge Amunihanen ne mahabet is nepatey zan. Naaǥew zan is 20 he inged puun te Aroer pehendiyà te peliǥuy te Minit taman te Abel Keramim.

³⁴Ne hein mid-ulì si Jefta ziyà te Mizpa, midsinuǥung sikandin te anak din he vahi he ebpurung dà edsayewsayew is edtukar te tamburin. Budtung sikandin he anak ni Jefta.

³⁵Ne hein naahà sikandin ni Jefta, mibindas din is bisti zin tenged te kegkeseeng din, ne ke sikandin te, “Anak ku, midhimu nu he utew a meseeng! Su nekepenangdù a ziyà te Nengazen he ibpemuhat ku ziyà te kandin is egkehuna he edsinuǥung kedì, ne kenè ku en heini egkevelvelewanan!”

³⁶Midtavak haazà is anak ni Jefta te, “Amà, nekepenangdù ka ziyà te Nengazen. Umbe, tumana nu is penangdù nu, su impezaag keniyu te Nengazen is menge kuntada niw he menge Amunihanen.

³⁷Piru zuen ku zà edhengyuen diyà te kenikew: tuǥuti a kenikew te kedriǥuriǥu ziyà te menge vuntud seled te zezuwa he vulan, te kedlalew zuma te menge emiǥu ku he menge vahi, su ebpatey a he kenè en egkeesawa.”