Soũↄ 78:1-70 - Bibeli Luayãtaalá

¹Asafa lɛ. Ma gbɛ̃́ↄ, à ma lɛdama ma, à swã́kpa ma yã́i.

²Má yã'oɛ́ ń yáasio, má yã́ pↄ́ ulɛa za zi bↄↄlɛkɛɛ́,

³yã́ pↄ́ wá mà mɛ́ wá dↄ̃, yã́ pↄ́ wá maeↄ a galikɛ̀wɛ̃ɛ.

⁴Wá yã́pi ulɛ wá nɛ́ↄnɛo, wá Dii táasilɛa da wá tↄũnaↄnɛ ń aà gbãao ń yãbↄnsaɛ pↄ́ a kɛ̀ↄ.

⁵À yãdìlɛ Yakↄbu buiↄnɛ, à a ikoyã dà Isailiↄnɛ. A ò wá deziↄnɛ aa tó ń nɛ́ↄ dↄ̃,

⁶i gↄ̃ ń bui pↄ́ kpɛ́ↄnɛ fɛlɛkaa ũ, aai fɛlɛ dada ń nɛ́ↄnɛ sↄ̃,

⁷kɛ́ aa e Lua náaikɛ, kɛ́ Lua yãkɛaↄ su sã́ńguo, aaiↄ aà yãdilɛaↄ kũa,

⁸kɛ́ aasu wàↄ dɛ lán ń deziↄwao, asa aa swã́gbãakɛ̀ aa gì Lua yã́i, an sↄ̃ ku Luawao, aa náai vĩɛ̀o.

⁹Ɛflaiũ buiↄá kàzunaↄnɛ, ↄ̃ aa kpɛkpà zĩ guu.

¹⁰Aai zɛ ń Luabaakuańnↄoo, aa gì tɛ́i aà ikoyãi.

¹¹Aà yãkɛaↄ sã̀ńgu ń aà yãbↄnsaɛ pↄ́ a ↄ̀lↄnɛ́ↄ.

¹²À dabudabuↄ kɛ̀ an deziↄ wáa Zoã wɛ̃́lɛu, Egipi bùsuu.

¹³À ísia zↄ̃̀ɛ à bùańnↄ, à í bĩ́ibò.

¹⁴À dↄ̀aanɛ́ tɛlu guu fãanɛ, gwãasĩna sↄ̃ ń tɛ́ gupuao.

¹⁵À gbɛsi pàa guwaiwaiu, à í kpàmá zↄ̃ↄ lán ísia íwa.

¹⁶A tò í bↄ̀nɛ́ gbɛu, ípi bàalɛ̀ lán swadawa.

¹⁷Ɔ̃ aa gì tɛ duunawa, aa gì Musude yãmai guwaiwaiu.

¹⁸Aa gí kɛ̀ aa Lua lɛwɛ, aa ń pↄeã blɛ gbɛ̀awà.

¹⁹Aa Lua bɛ̃̀ɛbò aa mɛ̀: A fↄ̃ ↄpi'i dilɛwɛ̃ɛ sɛ̃u lae?

²⁰Gwa, à gbɛ lɛ̀, í bↄ̀ dàgua mɛ! A fↄ̃ blɛ ge nↄ̀ↄ kpáwá sↄ̃a?

²¹Kɛ́ Dii yã́pi mà, aà pↄ pà, ↄ̃ tɛ́ kũ̀ Yakↄbu buiↄwa, à pↄkũmabↄ̀bↄ Isailiↄwa.

²²Asa aai Lua yã́ sio, aa aà gbɛ̃́ suabaa gbãa náai vĩo.

²³À yãdà bàlumaɛ, à zɛwɛ̃̀ musu,

²⁴ↄ̃ mana kwɛ̀nɛ́ blɛ ũ, à musu pↄ́wɛna gbↄ̃ yònɛ́.

²⁵Aa malaikaↄ blɛ blè, à kũ̀sũakɛ̀nɛ́, à dìńla.

²⁶A tò ĩ́an gbãa bↄ̀ gukpɛ, ń aà gbãao à bↄ̀ gɛↄmidↄkĩi oi lↄ,

²⁷ↄ̃ à nↄ̀ↄ kwɛ̀nɛ́ lán luutɛ̃wa, bãↄ lìńla lán ísialɛ ũfãawa.

²⁸A tò aa kwɛ̀ ń bòou, aa gↄ̃̀ kálɛa liaa ń kpɛ́ↄi.

²⁹Lua pↄ́ pↄ́ aa a ni vĩ kpàmá, ↄ̃ aa sò aa kã̀ pã́upãu.

³⁰E a ni àↄ gɛ́ bↄińla, gↄↄ pↄ́ blɛpi da ń lɛ́u,

³¹Lua fɛ̀lɛ fɛ̃̀ńnↄ, à Isaili gↄ̃gbãaↄ dɛ̀dɛ, à ń ɛ̀waasoↄ kwɛ̀.

³²Gia ń beeo aa gì tɛ duunawaɛ, ń aà yãbↄnsaɛkɛaↄ aai aà náaikɛo.

³³Ɔ̃ à ń wɛ̃ni kɛ̀nɛ́ lán lɛ́'ĩanawa, a tò ↄ̃̀ↄnɛkɛa ń mìdɛ.

³⁴Tó à ń pisabò, aaì aà aɛya, aaì ɛa wà aà kĩ́i wɛɛlɛ ń wãao.

³⁵Aa dↄ̃̀ sa Lua mɛ́ ń gbɛsi ũ, Lua Musude mɛ́ ń Mìsina ũ.

³⁶Ãma aaì lɛ́mawà, aaì ɛɛtoɛ̀,

³⁷an sↄ̃ kuwào, aa aà bàakuańnↄ yã́ gbòo.

³⁸Aàpi sↄ̃ à ń wɛ̃nagwà, à ń duuna kɛ̃̀má, i ń midɛo. Ìↄ azĩa zùukɛ mↄ̀ↄmↄↄɛ, i a pↄkũmabↄbↄmá píio.

³⁹À ń gbɛ̃nazĩnkɛ dↄ̃̀má, asa aaì gɛ̃zɛa susai lán ĩ́anawaɛ.

⁴⁰Aa swã́gbãakɛ̀ guwaiwaiu gɛ̃n ũma'ũma! Aa aà pↄ yàɛ̀ sɛ̃u we à kɛ̀ zài.

⁴¹Aa Lua lɛwɛ, aa Lua lɛwɛ, aa Isailiↄ Lua pↄ́ a kua adoa fɛ̃̀.

⁴²Aà iko gbãa sã̀ńgu, lá à ń sí ń ibɛɛↄwa,

⁴³lá à dabudabuↄ kɛ̀ Egipi, mɛ́ à yãbↄnsaɛↄ kɛ̀ Zoã bùsuu.

⁴⁴À ń swa'iↄ lìlɛ au ũ, ↄ̃ aai fↄ̃ aa a imì lↄo.

⁴⁵À ũsĩnaↄ kàńgu, aa ń soso, ń blↄↄↄ lↄ, aa yãyìamá.

⁴⁶A tò kwaↄ ń pↄ́wɛnaↄ blè, à kwasutɛ̃ kà ń buapↄ́ↄu.

⁴⁷A tò lougbɛ ń vɛ̃ɛbuↄ kɛ̀ kɛ́lɛkɛlɛ, a zàa'ĩana ń kaa líↄ ɛ̀'ɛ.

⁴⁸À ń pↄtuoↄ músikɛ̀ ń lougbɛpio, lua sù ń kpàsaↄwa.

⁴⁹À a pↄkũma zↄ̃ↄ bↄ̀bↄmá, à ĩ́isɛ̀ńnↄ ń pↄfɛ̃o ń kpɛ̃nɛo, à músi malaikaↄ gbàɛmá.

⁵⁰À a pↄkũma gbà zɛ́, i zɛzↄ̃ gaɛ lↄo, à gagyãkàńgu.

⁵¹À Egipi nɛgↄ̃ɛ sɛ̃́iaↄ dɛ̀dɛ píi, Haũ bui gↄ̃sakɛ nɛ́piↄ gàga.

⁵²À bↄ̀ ń a gbɛ̃́ↄ lán sãↄwa, à dↄ̀aanɛ́ guwaiwaiu lán sã waiↄwa.

⁵³A bɛńnↄ, aa ku dↄdↄa vĩasai, an ibɛɛↄ sↄ̃, ísia kũ̀aamá.

⁵⁴À kàńnↄ a bùsu zↄ̃lɛu, gusĩsĩde pↄ́ a sì ń a gbãaopiu.

⁵⁵À buipãleↄ yànɛ́, ↄ̃ à ń bùsu kpaalɛ̀nɛ́ ń pↄ́ ũ, à uakpàkpa Isaili buipiↄnɛ.

⁵⁶Ɔ̃ aa Lua lɛwɛ aa gì aà yãmai, aa Musude yãdilɛaↄ kũao.

⁵⁷Aa kpɛkpà aa bↄ̀ aà kpɛ lán ń maeↄwa, aa náai vĩo lán sá gia baiwa.

⁵⁸Aa aà pↄ fɛ̀lɛɛ̀ ń ń sa'okĩio, aa aà zafɛ̃̀ɛ̀ ń ń tã́aↄ.

⁵⁹Kɛ́ Lua è màa, ↄ̃ aà pↄ pà, à ↄzↄ̃̀ Isailiↄzi pãsĩpãsĩ.

⁶⁰À a zwã̀akpɛ tò Silo we, aà bɛ pↄ́ a kpà gbɛ̃nazĩnaↄ guupi.

⁶¹A tò an wɛ̀lɛↄ mↄ̀ a kpagolo sɛ̀, ↄ̃mɛ aà gbãa ń aà gawio kúkĩi ũ.

⁶²A tò wà a gbɛ̃́ↄ dɛ̀dɛ ń fɛ̃ndao, aà pↄ pà bui pↄ́ a sɛ̀pizi.

⁶³An ɛ̀waasoↄ tɛkũ̀ zĩ guu, an wɛ̃́ndiaↄ i zãkɛlɛ dↄ̃ lↄo.

⁶⁴Wà ń sa'onaↄ dɛ̀dɛ ń fɛ̃ndao, an gyaaↄ i fↄ̃ ↄ́ↄlↄ̀o.

⁶⁵Ɔ̃ Dii vù ń io sa, lán gↄ̃sa pↄ́ vù ń wɛ̃'iowa.

⁶⁶À ń wɛ̀lɛↄ gbɛ̃̀, aa kpɛkpà, a tò aa gↄ̃̀ ń wío gↄↄpii.

⁶⁷Ɔ̃ à gì Ɛflaiũ buiↄzi, i Yosɛfu buipi sɛ lↄo.

⁶⁸Yuda bui ↄ̃ a sɛ̀ sa ń Siↄna gbɛ̀sĩsĩ pↄ́ á yeio.

⁶⁹À a kúkĩi dↄ̀ musumusu we, aↄ ku gↄↄpii lán dṹnia kálɛawa.

⁷⁰Ɔ̃ à a zↄ̀blena Davidi sɛ̀, à aà bↄ̀ sã kaau.