Pesalem 78:1-70

¹Ao ŋoc lauac, akêŋ taŋem ŋoc mêtê. Aê taŋem aocsuŋ ŋabiŋ.

²Aê gabe jaŋa aoc êtu jasôm biŋgôliŋŋa. Aê gabe jaôŋ biŋgôliŋ têm ŋamata tauanôŋa sa.

³Biŋ taŋ aêac aŋô to ajala ma tameŋi sêjac miŋ gêdêŋ aêac naŋ.

⁴Biŋ tau aêac ansa auc êndêŋ aêacnêŋ ŋapalê atom, tanac miŋ êndêŋ lau wakuc, taŋ têndaŋguc naŋ, gebe Apômtau gêgôm nê gêŋ towae ma ŋaclai to gêŋsêgageŋ.

⁵Eŋ gêwa biŋ sa aŋga Jakobnêŋ to kêwaka biŋ sa aŋga Israelnêŋ ma kêsakiŋ aêacnêŋ mimi gebe sêsôm lasê êndêŋ nêŋ wakuc.

⁶Gebe lau wakuc, taŋ têndaŋguc êsêac naŋ, sêŋô ŋawae ma tauŋ sênac ŋamiŋ elom nêŋ wakuc.

⁷Sêŋgôm amboac tonaŋ, go sêkêŋ mateŋ Anôtô to sêliŋ gêŋ, taŋ eŋ gêgôm naŋ, siŋ atom ec sêŋgôm ênê biŋsu êtu tôŋ.

⁸Gebe êsêac têtu gôlôac gêsuŋtêkwa ŋatoŋboa têtôm nêŋ mimi. Êsêacnêŋ ŋalêlôm geo gala ma nêŋ katuŋ kêsap Anôtô tôŋ ŋaŋêŋ atom.

⁹Epraimnê gôlôac sêpê talam lemeŋ kata, mago gêdêŋ siŋ ŋabêc naŋ sêc ŋamelocŋageŋ.

¹⁰Êsêac sêmasaŋ Anôtônê poac atom ma sebe sêsa nêŋ lêŋ êtôm ênê biŋsu atom.

¹¹Êsêac sêliŋ ênê gêŋsêga, taŋ gêgôm naŋ siŋ ma gêŋtalô, taŋ eŋ gêgôm êsêac sêlic naŋ, amboac tonaŋgeŋ.

¹²Eŋ gêgôm gêŋsêga êsêac tameŋi sêlic. Gêgôm aŋga gamêŋ Aiguptu ŋagaboaŋ Soan.

¹³Eŋ gêwa gwêc kêkôc ma kêkêŋ êsêac sêwê sêsêp ŋaluŋgeŋ sêja. Eŋ gêlêc dembom sa kêpi e amboac tuŋbôm.

¹⁴Eŋ gêwê êsêac ŋa tao gêdêŋ ocsalô ma ŋa ja gêdêŋ gêbêc.

¹⁵Eŋ gêga poc kêkôc aŋga gamêŋ sawa ma kêkêŋ bu kapôêŋ aŋga nom ŋalêlôm gêmêŋ mêŋêsêac sênôm e gêôc êsêac tôŋ.

¹⁶Eŋ kêkêŋ bu kêpulu aŋga poc ŋalêlôm ma bu tau gêc ŋasamac laŋgwageŋ kêsa gêja.

¹⁷Mago êsêac sêkêŋ sec gêjô gedeŋ tôŋgeŋ ma sêli tauŋ sa gêdêŋ Lôlôc Ŋatau aŋga gamêŋ sawa.

¹⁸Êsêac sêsaê Apômtaugeŋ sêjac ŋawae ma sêkapiŋ eŋ gebe êkêŋ mo êndêŋ êsêac êtôm êsêac tauŋ têntac gêwiŋ.

¹⁹Êsêac têtaŋ pêlê Anôtô gebe “Talic acgom, Anôtô oc êkêŋ mo êndêŋ aêac aŋga gamêŋ sawa me masi.

²⁰Eŋ gêjac poc e bu keseleŋ ŋasamac laŋgwageŋ kêsa gêja, ma oc êkêŋ mo to gwada gebe nê lau sêniŋ amboac tonaŋgeŋ me masi.”

²¹Apômtau gêŋô biŋ amboac tonaŋ e têtac ŋandaŋ kêsa. Ênê ja kêsa gebe enseŋ Jakob, ma nê lai kêpoa gebe enseŋ Israel

²²kêtu êsêac sêkêŋ gêwiŋ Anôtô atomŋa ma kêtu êsêac têntac kêpa sugeŋ gebe Anôtô ocgo ênam êsêac sa nec atomŋa.

²³Mago eŋ kêjatu tao lôlôcŋa ma gêlêc undambê ŋakatam su

²⁴ma kêkêŋ mana kêsêlô kêtôm kom gêjac gebe sêniŋ. Amboac tonaŋ eŋ kêkêŋ mo undambêŋa gêdêŋ êsêac.

²⁵Amboac tonaŋ êsêac seŋ aŋelanêŋ mo kêtu nêŋ gêŋ. Ma Anôtô kêkêŋ gêdêŋ êsêac kêtôm êsêac têntac gêwiŋ.

²⁶Eŋ kêkêŋ musalô kêsa umboŋ ma ŋaclai ŋatau kêkalem mula gêmêŋ.

²⁷Eŋ kêkêŋ gwada kêsêlô kêtôm kekop ma moc tomagê kêtôm gaŋac gwêcŋa.

²⁸Eŋ kêkêŋ kêsêlô kêsêp nêŋ gamêŋ, taŋ sêc naŋ ŋaluŋgeŋ, kêgi nêŋ bec, taŋ sêŋgôŋ naŋ auc.

²⁹Seŋ e gêôc êsêac tôŋ ŋanôgeŋ. Gêŋ taŋ teteŋ naŋ, eŋ kêkêŋ kêlêlêc gêdêŋ êsêac.

³⁰Nêŋ ŋalêlôm kêkac êsêac gêŋ amboac tonaŋŋa ŋawaô ma seŋ gêŋ gêc aweŋgeŋ

³¹e Anôtô têtac ŋandaŋ kêsa gêdêŋ êsêac ma geseŋ êsêacnêŋ lau ŋactêkwa ŋagêdô su ma gêjac lau Israel nêŋ lau matac ŋagêdô êndu.

³²Anôtô gêgôm nê gêŋ amboac tonaŋ, mago êsêac sêgôm nêŋ sec sêsiŋ sugeŋ, ma sêkêŋ gêwiŋ ênê gêŋtalô atom.

³³Kêtu gêŋ tonaŋŋa tec Apômtau kêkêŋ êsêacnêŋ bêc gêjaŋa amboac aweŋjaô ma kêkêŋ gêŋ ŋaclai sec sep tageŋŋa geseŋ naŋ jala sêmoa mateŋ jaliŋa su.

³⁴Gêdêŋ taŋ Anôtô geseŋ êsêac naŋ, gocgo aweŋ gêjac eŋ kêtiam ma sêjam tauŋ ôkwi to sesom eŋ.

³⁵Ma taêŋ gêjam nêŋ lamu Anôtô gebe Lôlôc Ŋatau Anôtô kêtu nêŋ kêsiwaga.

³⁶Mago aweŋsuŋ sêsôm biŋ dansaŋ ma imbeleŋ sêsau

³⁷gebe nêŋ ŋalêlôm kêsap eŋ tôŋ ŋajaŋa atom ma sêmasaŋ ênê poac kêtu anô atom.

³⁸Mago eŋ taê walô êsêac ma kêsuc êsêacnêŋ sec ôkwi ma geseŋ êsêac tauŋ su sêjaŋa atom. Eŋ gêjam têtac ŋandaŋ tôŋ gêdêŋ êsêac ma kêkêŋ nê ŋaclai kêtu awê kêpi êsêac samucgeŋ atom.

³⁹Eŋ taê gêjam êsêac gebe gêŋ palê-palê, têtôm gêŋ ŋajaô-jaô, taŋ êna e êna-ênageŋ naŋ.

⁴⁰Sêli aweŋ sa aŋga gamêŋ sawa gêdêŋ eŋ elêmê ma sêgôm ênê ŋalêlôm ŋawapac kêsa.

⁴¹Êsêac sêsaê Anôtô todim-todim kêtu gêŋ wakuc-wakucŋa elêmê ma sêgôm lsraelnêŋ Anôtô dabuŋ têtac ŋandaŋ kêsa.

⁴²Êsêac taêŋ gêjam ênê lêma ŋajaŋa atom, sêliŋ bêc, taŋ eŋ gêjam êsêac kêsi aŋga nêŋ ŋacjonêŋ naŋ siŋ.

⁴³Gêdêŋ taŋ gêgôm nê gêŋtalô aŋga Aiguptu to gêgôm nê gêŋsêga aŋga gamêŋ gaboaŋ Soanŋa naŋ.

⁴⁴Eŋ gêjam nêŋ bu ôkwi kêtu dec e lau Aiguptu nêŋ bu sênômŋa masi.

⁴⁵Eŋ kêkêŋ leloŋ taêsam ŋasec gêŋac êsêac to ôpôac, taŋ sêgôm êsêac têtu meloc naŋ.

⁴⁶Eŋ kêkêŋ moac tamoac seŋ êsêacnêŋ gêŋ ŋanô aŋga kôm ma gêŋ, taŋ lemeŋ sêgôm ŋakoleŋ elêmê naŋ, wagô jaseseŋ su.

⁴⁷Eŋ kêkêŋ kompoc gêjac êsêacnêŋ wain ŋamôkê popoc ma kom ŋamatu kêtuc nêŋ gêŋlêwê êndu.

⁴⁸Eŋ kêkêŋ kompoc gêjac nêŋ bulimakao ma ôsic geŋ nêŋ bôc totoŋ su.

⁴⁹Eŋ kêbaliŋ nê têtac ŋandaŋ kêpi êsêac ŋawaô. Eŋ geŋ oliŋ sec e nê ŋalêlôm kêmoatiŋ tôŋ ma kêkêŋ gêŋwapac sec toŋaê-toŋaê samob.

⁵⁰Eŋ kêpô nê têtac ŋandaŋ ŋabênic sugeŋ gêdêŋ êsêac. Eŋ kêjaŋgo êsêac katuŋ su atom, gêsiŋ êsêac sugeŋ sêsêp gêmac sec ŋalêlôm sêja.

⁵¹Eŋ gêjac ŋapalê ŋamêc samob êndu aŋga Aiguptu, Lau matac samob nêŋ ŋamêc sêjaŋa aŋga Hamnê bec.

⁵²Go gêwê nê lau sêsa sêmêŋ têtôm ŋacgejob gêwê nê domba ma gêjam gôliŋ êsêac aŋga gamêŋ sawa kêtôm domba pom kapôêŋ teŋ.

⁵³Eŋ gêwê êsêac sêmoa ŋaŋêŋgeŋ e têtêc tauŋ atom, mago kêkêŋ gwêc kêmakop êsêacnêŋ ŋacjo auc.

⁵⁴Amboac tonaŋ gêwa êsêac e sêô lasê ênê gamêŋ dabuŋ, sêô lasê lôc, taŋ eŋ lêma anôŋa kêkôc kêtu nê gêŋ naŋ.

⁵⁵Eŋ gesoc lau samuc sêmuŋ-sêmuŋ ma kêkêŋ Israelnêŋ gôlôacmôkê sêŋgôŋ lau tau nêŋ gamêŋ.

⁵⁶Mago êsêac sêsaê Lôlôc Ŋatau Anôtô to sêli tauŋ sa ŋapaŋ ma sêsap ênê biŋsu tôŋ atom.

⁵⁷Sêkac tauŋ su aŋga ênê ma sêgôm ênê biŋ paliŋ têtôm tameŋi. Êsêacnêŋ lêŋ keso kêtôm talam, taŋ sêkêkam ŋasôb mata kôtêŋ-kôtêŋgeŋ naŋ.

⁵⁸Êsêacnêŋ sakiŋ gamêŋ ŋabauŋa gêgôm eŋ têtac ŋandaŋ ma nêŋ sakiŋ anôtôi jabaŋa kêbôli ênê ŋalêlôm auc.

⁵⁹Anôtô gêlic e ŋalêlôm kêmoatiŋ tôŋ ma kêtiŋ Israel su samucgeŋ.

⁶⁰Eŋ gêwi nê bec aŋga Silo siŋ. Mala tau, taŋ eŋ jagêmoa ŋamalac ŋalêlôm naŋ.

⁶¹Eŋ kêkêŋ nê poac ŋakatapa, taŋ kêtu ênê ŋaclai to ŋawasi ŋabelo naŋ, ŋacjo sêkôc sêja.

⁶²Eŋ gêwi nê lau siŋ gêdêŋ ŋacjonêŋ siŋ ma nê ŋalêlôm kêbôli auc kêtu nê gêŋlênsêmŋa.

⁶³Siŋ geseŋ ênê lau matac su ma nêŋ lauo takiŋ sêjam wê ŋacŋa kêtiam atom.

⁶⁴Siŋ geseŋ ênê dabuŋwaga su ma sêlôc gêdêŋ êsêacnêŋ awêtuc gebe têtaŋ taŋiboa kêtu êsêacŋa atom.

⁶⁵Sêgôm sêmoa e Apômtau mata gêlac kêtôm ŋac teŋ gêc bêc e kêliŋ tau siŋ, go mata gêlac. Kêtôm ŋac siŋsêlêc teŋ gênôm gêŋ e kêjaŋiŋ eŋ.

⁶⁶Eŋ gêjac nê ŋacjo kêsêp dêmôêmuŋageŋ ma gêgôm êsêac e majeŋ tauŋ êndu-êndu.

⁶⁷Eŋ kêtiŋ Josepnê bec su ma kêjaliŋ gôlôac Epraimŋa sa atom.

⁶⁸Eŋ kêjaliŋ gôlôac Judaŋa sa. Lôc Sion tau, taŋ têtac gêwiŋ naŋ.

⁶⁹Eŋ kêsuŋ nê gamêŋ dabuŋ sa kêpi e jakêtôm undambê. Gêgôm e gêjac malac su kêtôm nom, taŋ êkô ŋêŋgeŋ naŋ.

⁷⁰Go kêjaliŋ nê sakiŋwaga Dawid sa, kêkôc eŋ su aŋga gamêŋ dombaŋa.