5Zɛ ń Diio, ǹ aà náaikɛ, i yã́ɛ beeↄ kɛnɛ:
6A tó yã́ bↄnnↄ na lán gudↄawa, a to ǹ bↄ maa lán fãanɛwa.
7Lɛkpaaũ Dii aɛ, ní sↄ̃́aaàzi, ńsu to saasɛna yã́ n kũ gbãa gↄↄ pↄ́ aà yã́ lɛ́ bↄlɛiɛo.
8Pↄkũma tó, mikɛ̃ pↄpaawa. Ńsu to yã́ lí n kũ gbãao, ì mↄ́ ń vãikɛaoɛ.
9Asa gbɛ̃vãiↄ midɛ, gbɛ̃́ pↄ́ an wɛ́ dↄ Diiziↄ mɛ́ aa gↄ̃ bùsu vĩ.
10À gↄ̃̀ yↄↄ kɛ́ gbɛ̃vãiↄ aaↄ ku lↄo, baa tó n ń wɛɛlɛ, ńyↄ̃ ń eo.
11Zĩabusanaↄ mɛ́ aaↄ bùsu vĩ, aaiↄ pↄnakɛò ń aafia zↄ̃ↄo.
12Gbɛ̃vãi ì vãikpaaĩ ń gbɛ̃maao, ì lɛ́sakãaàzi.
13Ãma Dii ìↄ aà yáalↄ, asa a dↄ̃ aà gↄↄ a pa.
14Gbɛ̃vãiↄ ì fɛ̃nda wo, aaì ń kakpa sáa, kɛ́ aa e taasideↄ ń wɛ̃nadeↄ kwɛò, aai gbɛ̃́ pↄ́ an yãkɛa maaↄ dɛdɛ.
15An zĩa fɛ̃nda a ń zↄ̃ ń sↄ̃u, wa ń sáↄ ɛ́'ɛnɛ́.
16Yↄↄna pↄ́ gbɛ̃maa vĩ dɛ gbɛ̃vãi dasiↄ àizɛɛa.
17Asa gbɛ̃vãiↄ gbãa a midɛ, ãma Dii ìↄ gbɛ̃maaↄ kũa.
18Dii tàaesaideↄ yã́ dↄ̃, an kpaalɛ ìↄ dɛ ń pↄ́ ũ gↄↄpiiɛ.
19Wí a ń kṹ yãpãsĩgↄↄo, baa tó nↄana kà, aaↄ kãaɛ.
20Ãma gaga a gɛ̃ gbɛ̃vãiↄgu, Dii ibɛɛↄ láa lá sɛ̃̀bↄlↄ ì láawa, aa gɛ̃lɛ lán súɛlɛwa.
21Gbɛ̃vãi ì pↄ́ sɛ̃amá, ìli a fĩaboo, gbɛ̃maa sↄ̃ ì gbada sↄũsↄũ.
22Gbɛ̃́ pↄ́ Dii báaadàńguↄ mɛ́ aa gↄ̃ bùsu vĩ, gbɛ̃́ pↄ́ à lɛkɛ̀nɛ́ↄ sↄ̃ aa midɛ.
23Dii mɛ́ ì zɛmikũ gbɛ̃́ɛ, aà pↄ ìↄ na aà kuawa.
24Baa tó àlɛ lɛlɛ, a lɛ́lɛ sↄlↄlↄo, kɛ́ Dii aà kũa yã́i.
25Ɛ̀waason ma ũ yãa, ↄ̃ ma zikũ̀, mi e Lua gbɛ̃maa vũ̀aa bauo, mi e aà nɛ́ↄ lɛ́ baakɛo.
26Ìↄ gbada gↄↄpii ìↄ pↄ́ sɛ̃anɛ́, aà nɛ́ↄ aaↄ dɛ báaadeↄ ũɛ.
27Mikɛ̃ yãvãiwa, níↄ yãmaakɛ, ní e ǹyↄ̃ ku gↄↄpii.
28Asa Dii ye maakɛai, a a náaikɛnaↄ vũaao. Aaↄ ku aafiaɛ gↄↄpii, gbɛ̃vãiↄ sↄ̃ aa midɛ.
29Gbɛ̃maaↄ mɛ́ aa gↄ̃ bùsu vĩ, aaiↄ ku we gↄↄpii.
30Ɔ̃nↄyã ì bↄ gbɛ̃maa lɛ́u, aà lɛ́ ì yã́zɛde o.
31Aà Lua ikoyã dↄ aà sↄ̃wa, aà gbá lí tii pↄewao.
32Gbɛ̃vãi ì gbɛ̃maa kpákpa kɛ́ à e aà dɛ.
33Dii a gbɛ̃maapi to aà ↄzĩo, a we yã́kpalɛ aà bleo.
34Sↄ̃́a Diizi, níↄ aà yã́ kũa, i n kã́fĩ, ní gↄ̃ bùsu vĩ, ní gbɛ̃vãiↄ midɛa e.
Soũↄ 37
Soũↄ 37:5-34