ZABURA 37:5-34

⁵Ǹ zɛ kũ Dikirio ǹ a náani kɛ, ani yã dínↄ kɛnnɛ.

⁶Ani tó yã bo kũnwo nna lán gudↄnaa bà, ani tó ǹ bo mana lán fãnantɛ̃ gupurakũnaa bà.

⁷Ǹ zɛ kũ mɛnao Dikiri arɛ ǹ a dã, ǹsun tó aruzɛkɛde yã n kũ gbãna gↄrↄ kũ à bò kũ a wɛ́zɛ̃ vãnioro.

⁸Ǹ pↄfɛ̃ tó ǹ mì kɛ̃ pɛ̃tɛ̃a. Ǹsun tó yã birenↄ n kũ gbãnaro, àdi su kũ yãvãnikɛnaaomɛ.

⁹Zaakũ gbɛ̃ vãninↄ ni kakatɛ, gbɛ̃ kũ ń wɛ́ dↄ Dikiriinↄ mɛ́ ògↄ̃ bùsu vĩ.

¹⁰À gↄ̃̀ fíti kũ gbɛ̃ vãninↄ nigↄ̃ kun doro, bee tó n ń wɛ́tɛ, ĩni ń lero.

¹¹Zĩdabusarinↄ mɛ́ onigↄ̃ bùsu vĩ, onigↄ̃ pↄnna kɛ kũ aafia zↄ̃kↄ̃ↄo.

¹²Gbɛ̃ vãni dì yã vãni kpákpa gbɛ̃ mananɛ, àdi sakaa pìtia.

¹³Ama Dikiri dìgↄ̃ a yáa dↄ, zaakũ à dↄ̃ kũ a gↄrↄ ni papa.

¹⁴Gbɛ̃ vãninↄ dì fɛ̃nɛda woto, òdi ń kà kpá sála, de ò le ò takasidenↄ kũ wɛ̃ndadenↄ dɛdɛo, ò gbɛ̃ kũ ń yãkɛna mananↄ kakatɛ.

¹⁵Ń zĩda fɛ̃nɛda ni ń zↄ̃ ń swɛ̃̀n, oni ń sánↄ ɛ́'ɛńnɛ.

¹⁶Pↄ́ fíti kũ gbɛ̃ mana vĩ de gbɛ̃ vãni dasinↄ aruzɛkɛla,

¹⁷zaakũ gbɛ̃ vãninↄ gbãna ni mì dɛ, ama Dikirimɛ gbɛ̃ mananↄ kũna ũ.

¹⁸Dikiri taarisaridenↄ yã dↄ̃, ń bakaa dìgↄ̃ de ń pↄ́ ũ gↄrↄ sĩnda pínki.

¹⁹Wé'i ni ń kũ yã pãsĩ gↄrↄ zĩro, bee tó nàa kà, onigↄ̃ kãna.

²⁰Gbɛ̃ vãninↄ sↄ̃ oni kakatɛ, Dikiri ibɛrɛnↄ ni láka lán sɛ̃̀la bↄ̀tↄↄ bà, ò gɛ̃tɛ lán túsukpɛ bà.

²¹Gbɛ̃ vãni dì pↄ́ sãkãḿma à a fĩna boro, gbɛ̃ mana sↄ̃ àdi gba da yↄ̃nkↄyↄ̃nkↄ.

²²Gbɛ̃ kũ Dikiri arubarikaa dàńgunↄ mɛ́ ògↄ̃ bùsu vĩ, gbɛ̃ kũ à lɛ́ kɛ̀ńnɛnↄ sↄ̃ oni kakatɛ.

²³Dikiri mɛ́ àdi zɛ́milɛ kũ gbɛ̃nɛ, a pↄ dìgↄ̃ nna a kunnaaa.

²⁴Bee tó à gɛ̃̀ɛ sì, ani lɛ́tɛ sↄrↄrↄro, kũ Dikiri a kũna yãi.

²⁵Kɛfɛnnan ma ũ yã, akũ ma zĩ kũ̀, mádi e Luda gbɛ̃ mana zùkũna zikiro, mádi e à nɛ́nↄ tɛn bara kɛro.

²⁶Àdigↄ̃ gba da gↄrↄ sĩnda pínki àdigↄ̃ pↄ́ sãkãńnɛ, a nɛ́nↄ nigↄ̃ de arubarikadenↄ ũ.

²⁷Ǹ kpɛ li yã vãninɛ ǹgↄ̃ yã mana kɛ, ĩnigↄ̃ kú bùsu dín gↄrↄ sĩnda pínki.

²⁸Zaakũ Dikiri ye yãzɛdei, ani a náanikɛrinↄ zukũnaro. Onigↄ̃ kun aafia gↄrↄ sĩnda pínki, gbɛ̃ vãninↄ sↄ̃ oni kakatɛ.

²⁹Gbɛ̃ mananↄ mɛ́ ògↄ̃ bùsu vĩ, onigↄ̃ kun gↄrↄ sĩnda pínki.

³⁰Ɔ̃ndↄ̃yã dì bo gbɛ̃ mana lɛ́n, a lɛ́ dì yãzɛde o.

³¹A Luda doka kú a swɛ̃̀n, a gbá dì sata pↄ́kearo.

³²Gbɛ̃ vãni dì gbɛ̃ mana kpákpa de à le à a dɛ,

³³ama Dikiri ni a tó a ↄĩro, ani we yãkpatɛ a blero.

³⁴Ǹ Dikiri dã ǹgↄ̃ a yã kũna, ani n kara de ǹgↄ̃ bùsu vĩ, ĩni gbɛ̃ vãninↄ mìdɛna e.