Y Salmo Sija 37:5-34

⁵Bira y chalanmo para as Jeova: ya angocogüe locue, ya güiya unajuyong este.

⁶Ya janajanao y tininasmo taegüije y manana: ya y juisiomo taegüije y taloane.

⁷Quieto jao as Jeova, ya nanggagüe nu y siningon: chamo umestotban mamaesa jao ni y mumegae, gui chalanña ni y taotao ni fumatitinas y dinague.

⁸Basta y binibo, ya polo y linalalo; chamo umestotban mamaesa jao para unfatinas y dano.

⁹Sa y chumogüe dano ufanmautut: lao y numanangga si Jeova, sija ujaereda y tano.

¹⁰Ya desde este didide ti utaegüe y taelaye: magajet na jaguefjajaso y sagaña ya utaegüe güe.

¹¹Lao y manmanso ujaereda y tano: ya ufanmagof maesa sija ni megae na pas.

¹²Y taelaye man jajaso dinague contra y manunas ya janachechegcheg y nifenñija guiya güiya.

¹³Si Jeova chumachaleg pot güiya: sa jalilie na ufato gui jaaniña.

¹⁴Y manaelaye jalagnos y espada, yan janadilog y atcosñija para uyute papa y mamoble yan y mannesesitao: para ujapuno sija y manunas gui chalan.

¹⁵Y espadañija jumalom gui corasonñijaja ya y atcosñija umayamag.

¹⁶Maulegñaja y didide gui manunas, qui y minegae gui megae na manaelaye.

¹⁷Sa y canae y manaelaye ufanmayamag: lao si Jeova jamantietene y manunas.

¹⁸Jatungo si Jeova y jaanen y manunas: ya y erensiañija usaga para taejinecog.

¹⁹Sija, ti ufanmamajlao gui taelaye na tiempo: ya y jaanen ñinalang ufanjaspog.

²⁰Lao y manaelaye ufanmalingo: yan y enimigon Jeova ufanparejo y sebon cotdero sija: sija ufanlinachae, calang aso ufanguelinachae.

²¹Y manaelaye mañuñule inayao ya ti jaapapasetalo: ya y manunas guaja minaaseñija ya mannae.

²²Sa ayosija y manbendise pot güiya ujaereda y tano: ya ayosija y manmatdise pot güiya ufanmautut.

²³Sa y jinanao y mauleg na taotao si Jeova mumantietene; ya güiya yaña y chalanña.

²⁴Yaguin matomba, ti uguefpodong: sa si Jeova mumantietene nu y canaeña.

²⁵Guine patgon yo ya estayo bijo; lao tatnae julie y mauleg madingo, ni y semiyaña manegagao nengcanoñija.

²⁶Todotdia guaja minaase yan ninaayao: ya y simiyaña para bendision.

²⁷Suja gui taelaye, ya fatinas y mauleg; ya sumasasaga jao para taejinecog.

²⁸Sa si Jeova yaña y juisio, ya ti jadingo y mañantosña: sija ufanmaadaje para siempre: ya y semiyan y manaelaye ufanmautut.

²⁹Y manunas ujaereda y tano ya usaga para taejinecog gui jiloña.

³⁰Y pachot y manunas manguecuentos minalate, ya y jilaña cumuecuentos juisio.

³¹Y lay y Yuusña gaegue gui corasonña, pot enao na y adengña ti usulong.

³²Y taelaye jaespipia y tinas ya jaegaga para upuno.

³³Si Jeova ti upinelo gue gui canaeña: ni usinentensia güe yan manjusga.

³⁴Nangga si Jeova ya adaje y chalanña, ya güiya unninataquilo para unereda y tano: anae y manaelaye ufanmautut, jago siempre unlie.