SEKERIA 7

1

2

3

4

5

6

7

8

9

10

11

12

13

14

¹King Darauese ena lohia laḡanina ihahanina ai, huana ihataurahani-tana, ladana Kisleve, dinana ihahanina lalonai, Iehova ena hereva na Sekaria enai e kau.

²Una negana ai Betele taudia ese Saresere bona Regeme-melek, mai edia orea taudia ida, e siaidia lao, Iehova bae noia, ena hahenamo na latadiai baine kau.

³Bona Iehova Sabaota ena dubu ai hahelaḡa taudia bona peroveta taudia na bae nanadaidia baeto, Hua iha-imana ai baina taitai bona baina anivaga, laḡani gunadia momo lalodiai vada na karaia heḡereḡerena eiava?

⁴Bena Iehova Sabaota ena hereva na egu ai e kau, eto,

⁵Tano taudia iboudiai bona hahelaḡa taudia danu ba hamaorodia, baoto: Ene laḡani hitu-ahuiosi lalodiai, hua iha-imana ai bona hua ihahituna ai o taitaiva bona o anivagava negadia ai na lau daigu ai o anivagava a?

⁶Bona o anianimu o inuinumu negadia ai, umui sibomui daimui ai o anianimu bona o inuinumu, ani?

⁷Ierusalem bona ena hetabira hanuadia na e noholaidiava mai namodia ida, bona diho kahana bona taora kahadia danue noholaidiava, negana ai ini hereva na Iehova ese peroveta taudia gunadia ududia amo e gwaurai, ani?

⁸Iehova ena hereva na Sekaria enai e kau, eto,

⁹Iehova Sabaota na ini e gwau tomamu: Ba hahemaoro ḡoevaḡoeva; ta ta tadikakana tadikakana bae kara namo henidia bona bae bogadia hisi.

¹⁰Vabu, ihareha, noho-hedoa tauna, ogoḡami tauna basio hahisidia; bona ta ese tadikakana ihadikana dalana ta basine lalo hatalaia.

¹¹A idia na asie ura bae kamonai; bena e helai muri henia bona taiadia e kodobedia, basie kamonai helaoreana.

¹²Lalodia na e ha-aukadia masemase, Iehova Sabaota ena Lauma ese peroveta taudia gunadia edia amo e siaidia taravatudia bona herevadia bae kamonai na garina. Taunabunai badu ḡaraḡara bada-herea na Iehova Sabaota ena amo e kau.

¹³Iehova Sabaota na e tomu, Lau na boiboi bena idia asie kamonai heḡereḡerena ai idia e boiboi bena lau asina kamonai;

¹⁴bena koe-hirihiri amo na hakarohodia rohoroho, asi dibadia besedia iboudiai bogaragidiai. Taunabunai, e rakatania tanona na vada e vahu, asi lao mai tauna ta; tano namona vada e havahua vaitani.