San Lucas 22:4-63

⁴Aan lëë Judas kwey lo xaa nii xñabey pxosy ni lo xaa nii xkyënap lidzy Dios parñee këb xaa dyon xa jkaa Jesús.

⁵Ble xaa go lo Judas, aan lëë xaa chëb nii stee xaa tumi.

⁶Byo xtiits xaa go styoo Judas. Por ngo lëë xaa bislo byub xaa xa jkaa Jesús tu laañee kindy meñ parñee jko xaa Jesús ña xaa xñabey.

⁷Lëë paskw kol. Lo lni go xtyaaw kyaxtily nii xkyëdy levadur, ni chuty meñ mëkwxiily.

⁸Por ngo lëë Jesús chëb lo Pedre ni lo Juan: —Kol tsikuuñlo nii tyaaw xtsee no na paskw.

⁹Lëë xaa kwnabtiits chëb xaa lo Jesús: —¿Pa kyokuuñloo noow?

¹⁰Tsigo lëë Jesús chëb: —Tsiñee ktsiñ do leñ kyedzy, lëë do kan tu xaa nii nsob yañ tub che nis. Kol tsinal xaa axte laañee ktsiñ xaa,

¹¹aan kol këb lo xpixwan yu: “Lëë maestre pxaal lëë noo parñee kñabtiits noo pa sob yu laañee kawxtsee xaa ksa xpëëdscuel xaa na paskw.”

¹²Lëë xaa kluuy tu cuart ngol nii sob kik lidzy xaa, xixkwaalew. Siko kol kuuñlo nii tyaaw xtsee no.

¹³Lëë xpëëdscuel xaa si aan lëë xaa ptsil yu nii chëëbpee Jesús, aan lëë xaa beeñlo nii kak xtsee paskw.

¹⁴Tsiñee lëë xwor xtsee kol, lëë Jesús kwsob lo mezh ksa xaa apostle.

¹⁵Aan lëë Jesús chëb: —¡Penaadle non gan kawnin lëë do na paskw antes nii ketyaa!

¹⁶Por axte nii klañche xkyalwnabey Dios kuñaa paskw stub.

¹⁷Loxsye ngo lëë xaa kwseñ tu vas viñ, aan loxsye ptee xaa skizh lo Dios, lëë xaa chëb: —Kol ki nrii ni kol kiisyo lo xcombañer do.

¹⁸Por nli xñen nii kidraa viñ sink lëën kwës axte klyañche xkyalwnabey Dios.

¹⁹Lëë Jesús kwseñ tu kyaxtily, aan loxsye pteedy xaa skizh lo Dios, lëëw beeñ grol xaa, aan lëëw pteedy xaa lo xpëëdscuel xaa chëb xaa: —Lëë xcuerpaa nrii. Kol kawo parñee ksaladzy to naa, por lëën kety parñee telaa do.

²⁰Singo gak tsiñee lëë xtsee kwlox, lëë xaa kwseñ tu vas viñ aan lëë xaa chëb: —Tu cheñaa nrii. Lëëw kxee parñee kpily xtol do.

²¹’Lëë na lëë xaa nii kakniladzy naa sob lo mezh nu.

²²Per no nii ktsiiñaa laañee pxaal Dios naa. Per ¡brobsye xaa nii kakniladzy naa!

²³Tsigo lëë xpëëdscuel xaa bislo xñabtiits lo xcombañer dyon cho xaa kokniladzy Jesús.

²⁴Lëë xpëëdscuel Jesús ptilytiits parñee kaknan dyon cho xaa mastre non.

²⁵Tsigo lëë Jesús chëb: —Nan do gon xa chuuñtsyey xaa nii xñabey lo kislyu ni nan do nii chakladzy xaa nii këb meñ nii tir buen xaa.

²⁶Per lëë lëë do nody nii kak to singo, sink deelñee no tu do chakladzy kñabey no nii kak to sinak tu xaa nii xsoob tiits ni sinak tu xaa wiñ.

²⁷Kol në dyon cho mastre non, ¿pe xaa nii xsyob lo mezh chawo ote xaa nii xkyë niskwaano yak? ¿Pe lëdy xaa nii xsyob lo mezh nak xaa non? Per lëë naa, lëën no lady to sinak tu xaa nii chuñ mandad.

²⁸’Ni kon gaa to kchë kyalnë ptsyoolaa aan psaandy to naa.

²⁹Por ngo lëën knetsy kyalwnabey lo do sinak nii bneetsy Tat Tioso lon,

³⁰aan lëë do kaw ni lëë do ki laañee xñabeyaa ni lëë do sob parñee kñabey do lo ksa tsiipchop tiiy meñ nii no tañ Israel.

³¹Loxsye ngo lëë Jesús chëb: —Simoñ, lëë xaatox gon kwnab lëë do parñee kuxso xaa to sinak xchooxso xobxtily.

³²Per lëën kwnab lo Dios nii kakni xaa lii, parñee kchosody styool kaazhkaa, aan tsiñee lëë styool kpikche, pchoobladzy styoo xcombañeeroo parñee kchosody styoo xaa.

³³Tsigo lëë Simoñ Pedre chëb: —Nikle win tso skiib, ni nikxe kety no tusyke, per ksandyaa lii.

³⁴Per lëë Jesús chëb: —Pedre, na kyool kazh tson vuelt këëboo nii xyuumbeydyoo naa antes nii jkwetsy nguidy kol.

³⁵Tsigo lëë Jesús chëb: —Tsiñee pxalaa lëë do sin bols, ni sin tumi, ni sin kyalkidy, ¿pe no dyon pe cos kok falt lo do? Tsigo lëë xpëëdscuel xaa chëb: —Ni tu pe kokty falt.

³⁶Lëë Jesús chëb: —Lëë na, deelñee no cho do chap bols, kol koyo, ni kol koy tumi. Aan deelñee chapty to spad, kol kto xchaket to aan kol si tuwo.

³⁷Por no nii kak cumplir xkitsy Dios nii xñee nii win pkab lady xaa mal. Kchë laañee chakyety nii ktsyoolaa kak cumplir.

³⁸Lëë xpëëdscuel xaa chëb: —Maestre, lëë chop spad xoob nu. Tsigo lëë Jesús chëb: —Kol ksaano.

³⁹Loxsye ngo lëë Jesús si kiy nii lë Olivos aan lëë xpëëdscuel xaa sinal.

⁴⁰Tsiñee lëë xaa ptsiñ siko, lëë xaa chëb: —Kol kutiitsni Dios parñee kyabty to lo tol.

⁴¹Aan lëë xaa kwsë lal laañee xyab tu kyo tsiñee xkëë meño, aan lëë xaa psoxib par kutiitsni xaa Dios,

⁴²chëb xaa: —Tat Tios, pteelaa naa lo kyalnë re, per kuuñtsyeydyoo nii chakladzyaa, sink beeñtsyey nii chakladzyoo.

⁴³Ngo nonee xaa tsiñee lëë tu angly byety kpaa par ktee xfuersy xaa.

⁴⁴Lo xkyalnë Jesús mastre chutiitsni xaa Dios, aan axte lo lyu byab nis nii psinis xaa, xñaw si xña cheñ.

⁴⁵Tsiñee lëë xaa lox bitiitsni Dios, lëë xaa sey laañee nche xpëëdscuel xaa. Per ksasy xpëëdscuel nche nixyesy, porñee tir xteenë xaa.

⁴⁶Tsigo lëë xaa chëb: —¿Penak nche nixyesy to? Kol tsische aan kol kutiitsni Dios, parñee kyabty to lo tol.

⁴⁷Lëë Jesús bii nonee, tsiñee lëë tubtsoon meñ ptsiñ. Lëë xpëëdscuel xaa nii pcholë Judas nech lo meñ, aan lëë xaa ptee tu pxit kwesy Jesús,

⁴⁸per lëë Jesús chëb: —Judas, ¿con tu pxit nawen jkol naa ña meñ re?

⁴⁹Tsiñee lëë xaa nii nak ksa Jesús kon nii ktsyool Jesús, lëë xaa chëb: —¿Pe stiily noo con spad?

⁵⁰Aan lëë tu xaa nii nak ksa Jesús biswee tu xmos xaa nii mastre non lo pxosy, pchug xaa tyag xaa nii sob nëzli.

⁵¹Tsigo lëë Jesús chëb: —Kol ksaan. Lëë xaa kwseñ tyag mos ko, aan lëëw beeñ kyak xaa.

⁵²Loxsye ngo lëë xaa chëb lo xaa nii xñabey lo pxosy, ni lo xaa nii xkyënap lidzy Dios, ni lo xaa kol nii sinaasy xaa: —¿Penak nii sëëdxi do naa con spad ni yag nyak xaa ngbaan?

⁵³Ksatyee tse kwyon lady to leñ lidzy Dios, aan kwnaasty to naa. Per nyoo nii lëë xaatox xchëëp lëë do nina.

⁵⁴Lëë meñ kwnaasy Jesús, aan lëë meñ kuni xaa lidzy xaa nii mastre non lo pxosy. Lëë Pedre kunal sit sit.

⁵⁵Lëë meñ psaay ki groltyee lo ley. Aan wi Pedre kwsob lady meñ go chu ki.

⁵⁶Siko sob Pedre tsiñee lëë tu kwnaa nii xkyë tsiiñ siko kon xaa aan lëë me chëb: —Wi meñ gue nak ksa Jesús.

⁵⁷Per lëë Pedre chëb: —Xyuumbeydyaa xaa gue.

⁵⁸Kok xtsedyako, lëë stu xaa nii so siko kon Pedre, aan lëë xaa chëb: —Wil lë no xlad Jesús. Per lëë Pedre chëb: —Lëdyo.

⁵⁹Nonsyak koko tu wor, lëë stu xaa chëb: —Soot paa gon nii wi xaa gue no xlad Jesús, por xaa Galilea xaa.

⁶⁰Per lëë Pedre chëb: —Nandyaa pe cos xñeel. Aan wor go kazh, mentre lëë Pedre bii nonee, lëë tu nguidy kol pkwetsy.

⁶¹Tsigo lëë Jesús psuugw lo buy lo Pedre. Lëë Pedre gaa psaladzy nii chëb Jesús: “Na kyool kazh tson vuelt këëboo nii xyuumbeydyoo naa antes nii jkwetsy nguidy kol.”

⁶²Lëë Pedre pchoo siko aan lëë xaa biiñ.

⁶³Lëë xaa nii kwënap Jesús ptee xcheñ xaa ni kwtsityni xaa xaa.