Luk 22:4-63

⁴Ma inae da taparoro babadisi i babada ma Taparoro Numana kana potapota i babada kurisi ma yavata ivi sisiya da ikikava Yesu iti wawanei.

⁵Babadisi ivi nuwabiibii kirakai ma ivi vaghinei da Judas imana ita kovoghi.

⁶Ma bade Judas ivi vaghinei ma taraboga biibiina iekwekwai da maranai wawaya kegha na Yesu babadisi ku imasi ita terei.

⁷Marana inekiibau da sipu gegeyisi iti kiivunuwana Pasova kamna kubiine.

⁸Yesu kana kivikivina ruwa, Pita ma Jon ivonatawesi. Ivonesi bo, “Konae. Kona vovunagha da Pasova kamna kubiine.”

⁹Ma ivi tarakiiyanei bo, “Imapatana kekayokayowekai da kana vovunagha?”

¹⁰Ma ivonapotesi bo, “Korui ku Jerusalem ma tomowa sago kona panani, tuna okowa kibubuna ina kavakavari. Kokivini da meni ku numana ina rurui na yavata korui.

¹¹Ma numa badana kovonei bo, ‘Akii Bada ivona da tupayaraghina kuni beyekai da kamonai tuna yavata Pasova kubiine kana kam.’

¹²Tomowina na tupayaraghina ghamana kiidamowai ini beyemi. Kamonai na sawara kudubina ivovunaghi ikovi ma vokuya kava kona berai.”

¹³Pita ma Jon ivomiiri ma irui ku Jerusalem ma Yesu ikikava ivonesi na nakanani ipanani. Ma nani dobunai ivokuya da Pasova kamna kubiine.

¹⁴Ravi ipika ma kam kubiine Yesu kana kivikivina yavata nevanevasiyai ikenavipika.

¹⁵Ma ivonesi bo, “Aku kayowana ghamana da weni Pasova kamna takam patapata ma muriyai da ani kamaghi kirakiiyei.

¹⁶Avonavonemi da ke meyani Pasova kamna ana kam meyei ina nenae da maranai God ina vikiivavona ina nekiibau ma Pasova berasi iyamsi vaghata ini debe yavui na tuna maranai ana kani.”

¹⁷Ma Yesu redu iviiya ma God ivi kiikiiwei ma ivona bo, “Wena koviiya ma kamomiyai kovi umavereyana.

¹⁸Avonavonemi da ke meyani wain anuma meyei ina nenae da God ina vikiivavona ina nekiibau na tuna maranai anumai.”

¹⁹Yesu parawa iviiya ma God ivi kiikiiwei ma ivogimagimai. Ireregha kurisi ma ivonesi bo, “Weni tuna na tupuwiku. Weni berana kona beraberai da kona notanotiku.”

²⁰Ma bade nakanani kam murinai redu iviiya ma ivona bo, “Weni reduna imatakira da tami kubiimi taraku ina sororo da God ina vivaghina makamakiina vuna ina wawaya yavata ina berai.”

²¹“Ma kovi yana, wawayina ini wawaneku na wekarakava yavata takamkam patapata.

²²God ina kayowana ikikava itereterei na nakanani ina tupuwa taku, Wawaya Natusi kuriku da ana rabobo. Ma tam iyai kuni wawaneku na kuti nuwapoya kirakai, iyamna kovogha ghamanakina kuna panani.”

²³Ma kana kivikivina kamosiyai ivivi tarakiiyana meyesi da iyi weni berana ina berai.

²⁴Yesu kana kivikivina ti mani kavakava ivivi taghegheyanesi da kamosiyai meni wawayina na ghe kirakai.

²⁵Ma ivonesi bo, “Kupuna damsi i kiikiivavo i vibadana na ibagibagi kirakai ma ekayokayotata ma enotanotai da i wawaya ivite bubunisi.

²⁶Ma tami na ke nakanani kona berai. Kamomiyai wawaya ghamana ina tereoruwe meyei da tuna nakanani ma wawaya kikei. Ma meni wawayina ini bada na ina tereoruwe meyei da tuna nakanani ma bigabiga wawayina.

²⁷Meni wawayina na wawaya ghamana, wawayina kepanai imakai da ekamkam bo wawayina ebigabiga da vavai ererereghi? Wawaya ghamana na ekamkam, tabo? Ma taku, ke nakanani ata beraberai. Kamomiyai taku na ami bigabiga.”

²⁸“Ma wawaya ivi tupaketowaneku na tami kovi patutu kirakai da ke meyani kota kuyoweku.

²⁹Ikikava aku Mamai vibadana ivereku na bade nakanani tami vibadana ana veremi.

³⁰Nani maranai na aku kepanai takam ma tuma ma kiikiivavo kii gawariyai kona makai da dam ivi 12 Israel kamonai koni badesi.”

³¹Yesu ivona bo, “Saimon, Saimon, Seitan ivi nowi God kurina ma vivaghina gwabinai iviiya da ina ruyaghimi.

³²Ma anipowana kubiim da vitumaghana ke kuna voterei. Karakava kuna miiritavire kuriku na turaturam kuni vitesi da ti bade i vitumaghana ini rewapana.”

³³Ma Saimon Pita ivona bo, “Bada, taku kovokovoghiku da tam yavata ku gabura tarui bo yavata tarabobo.”

³⁴Ma Yesu ivonapotei bo, “Pita, avonavonem da karako mara aroba kuni bero da ke kutakoviku ma murinai kokoreko ina tou.”

³⁵Yesu kana kivikivina ivona tovonisi bo, “Rorova avonemi da kaeterepapara bo wagu bo mane kana kutu ke kota yuna ma avonatawemi. Kade ami baba kamonai nuwapoya kopanani bo kegha?” Ma ivonapotei bo, “Kegha.”

³⁶Ma ivonesi bo, “Ma wekarakava na mane kana kutu bo wagu gwabimuwai na kekavari. Ma mikeda tam seri gwabimuwai kegha na kam nuba garana kevi gimarei da seri kuna gimari.

³⁷Giruma katamana kamonai ivona bo, ‘Wawaya beroberosi yavata kovogha ina viiya. Ma avonavonemi da weni girumina na taku ivi sisiyeku. Vonavaghata, ikikava igiruma da ita tupuwa na peyarina wekarakava etuputupuwa.’”

³⁸Ma kana kivikivina ivona bo, “Bada, kekitai. Seri ruwa weni.” Ma Yesu ivona bo, “Vaghina, kovokovoghina.”

³⁹Yesu mara nonowa ikiikiibau ku Oliv koyana, tuna kubiine kana kivikivina yavata ivomiiri ma Jerusalem ikiibutawei da inae nake.

⁴⁰Inekiibau na ivonesi bo, “Konipowana da ruyagha kamonai ke kona peku.”

⁴¹Kana kivikivina ikuyowesi ma inae ke gurina ma ivi tuwaporeruruwana ma inipowana bo,

⁴²“Mamai, kivaghinei bo kegha da weni vokwarakwara reduna gwabikuwai kuta viitawei. Ma ke taku aku kayowana ma tam am kayowana ina tupuwa.”

⁴³Ma aneya kunumai ioru da rewapana iverei.

⁴⁴Ma nuwapoya ikiivunui kubiine na nuwanuwana kudubinai inipowana kirakai da poyagururu iterevunui. Ma poyapoyana ivivi toi na kitana nakanani ma tara.

⁴⁵Nipowana ivoterei ma ivomiiri da ivovira kana kivikivina kurisi, ma ipananisi da nuwapoya ikiivunusi da ivivi keneyana.

⁴⁶Ma ivonesi bo, “Avi kubiine kokenakena? Kovomiiri ma konipowana da ruyagha kamonai ke kona peku.”

⁴⁷Yesu ivivi sisiya kamonai ma koroto ghamana inekiibau. Judas ivi nowesi, tuna na kana kivikivina sago. Imiiririya Yesu kurina da ita yoni,

⁴⁸na Yesu ivi tarakiiyanei bo, “Judas, viwawana kubiine taku Wawaya Natusi keyoyoniku, bo?”

⁴⁹Ma kana kivikivina ikitai da aviyavisina ituputupuwa na ivona bo, “Bada, akii seriyai kana ravisi, bo?”

⁵⁰Ma kana kivikivina sago taparoro badana ghamana ina bigabiga iravi da tinina katagheyana ikiiyaraghatawei.

⁵¹Ma Yesu ivonesi bo, “Kovoterei!” Ma ivororona da tomowina tinina ivotovoni da iyawasa.

⁵²Ma Yesu taparoro babadisi i babada ma Taparoro Numana kana potapota i babada ma kwanatu babadisi peyarisi kurisi ivona bo, “Taku aighaviyemi bo, da kaku seri ma kaku kepata kokavarapiyei?

⁵³Mara nonowa tami ma taku Taparoro Numana garina kamonai tamakamakai, ma ke kota paniku. Ma wekarakava na kami mara ipisi na nubakutuva ina rewapana ibademi.”

⁵⁴Seri damsi Yesu ivotani ma irutini inae da taparoro badana ghamana ina ku numa. Ma Pita murisiyai ikivinisi inae.

⁵⁵Ma taparoro badana ina numa garina kamonai na wawaya keyama ikiiri da ivivi rarana. Ma Pita inae da kamosiyai imakai.

⁵⁶Bigabiga wavinena sago ikitai da Pita keyama ririnai imakamakai. Keyama gweyorinai ikita bubuni ma ivona bo, “Weni tomowina tuna Yesu yavata ibababa.”

⁵⁷Ma Pita ivi bero bo, “Wavine, taku nani tomowina ke atakovi!”

⁵⁸Imakai mara gisina ma tomowa sago Pita ikitai ma ivona bo, “Tam na Yesu kana kivikivina sago.” Ma Pita ivona bo, “Aku tomo, taku ke meyani ata kivini.”

⁵⁹Imakai da ke gurina ma bade wawaya sago ivona bo, “Vonavaghata, weni tomowina na Yesu kana kivikivina, iyamna tuna na Gariri wawaya.”

⁶⁰Ma Pita ivonapotei bo, “Aku tomo, kegha. Taku ke atakovi da aviyavisina kisisiyei!” Nakanani ivivi sisiya ma kokoreko itou.

⁶¹Ma Bada Yesu itavire da Pita ikitatupei. Ma Pita ina nota ivovira da Yesu ina sisiya inotai. “Karako mara aroba kuni bero da ke kutakoviku ma muriyai kokoreko ina tou.”

⁶²Ma vaghina, Pita numa garina ikiibutawei ku kupuna ma itou kirakai.

⁶³Seri damsi Yesu ikoyakoyaghi na ivowavowai ma ivivi namei.