San Lucas 22:4-63

⁴Usne ɨt kit pariyaruzpa mikwaruzakasa Dios katsa yal izmuruzakasas kwinta kinara, Jesústa usparuza chɨhkanapa.

⁵Uspane wat kulat kit ussa pial taana namarɨt.

⁶Usparuza chɨhkan namtawane, usne wat payura saira, ussa akkwan awa tuchira chɨhkanpa.

⁷Suasne Pascua pishta taizta. Sun pishta izamtuasmin, pan samtu, kiña wintachin. Uspane pɨrikukas piantam.

⁸Jesúsne Pedrorakas Juantakas ɨnin kit ka kaizta: —Ɨt kit Pascua pishta sarain, au kwan.

⁹Uspane ussa mɨmaara: —Aune ¿Mɨntama pishta sanapai?

¹⁰Usne usparuza sɨnkanara: —Mɨrain. Pɨpulura naptazasmin, une maza ampu kwazi kalpu kwamikasha wanmalpailnazi. Ussa kwizpa kanparain, paiña yalta napnakima.

¹¹Yalpamikasha ka kiztain: “Kamtamne aumɨza ka mɨmana ɨninta: ¿Mɨnta up kalmal tui? Suane nane Pascua kumira ap kammuruzkasa kwanash.”

¹²Suasne usne umɨza yalkin kwashta katsa kalmal ananazi. Suane pishta sarain.

¹³Uspane ɨil kit us kaizta aizpa wanmalpail kit sua Pascua kumira sailta.

¹⁴Kumtu ura taizkane, Jesúsne misharɨ uzta, paiña ɨnintaruzkasa kwan.

¹⁵Usne usparuza kaiznara: —Naiztuchasmin, nane ukasa an Pascua kumira kwashimtus.

¹⁶Apain mamaz Pascua kumira kumanash. Chiyura, Dios paiña kwaltuza ɨninnapa akane, nane mamasa Pascua kumira kwanash.

¹⁷Taza piztawane, Diosta aishtaish kiztawane, Jesúsne kaiznara: —An taza sap kit vino pi uruza nailtain.

¹⁸Uruza kaiznamtus. Makis an sukin an vino pi kumanash, Dios ankima, Dios ɨnintukin, paiña kwaltuza ɨninnana. Suasne sua mamasa sun kwanash.

¹⁹Pankas saptawane, Diosta aishtaish kiztawane, Jesúsne pan kɨz kit usparuza nail kit kaiznara: —An panne ap ña i. Na u akwa inash. Sun kirain, nawa nɨjkulanapa.

²⁰Kapal kuarawane, usne taza piz kit kaiznara: —An vino pi ap aimpi i. Ap aimpi puzkane, nane u akwa irɨnazi, u kwail kiarɨt aizpa wat kulnana. Sunkana ñamin Diosne kin namta, u kwail kiarɨt aizpa wat kulnana.

²¹Mane iztain. Nawa chɨhkamtumikane an misharɨ nakasa kumtu.

²²Chiyuras Ampu namtɨtmika irɨnpa narɨtkas, nawa chɨhkamtumikane kwisha tayal kit naiztɨnazi.

²³Uspane usparuzpain mɨmaat kit ka kizara: “¿Mɨnma sun kinsa?”

²⁴Uspane usparuzpain aliz kaizat kit mɨmaara: “¿Auruzpain mɨnmikama an tɨnta mika i?” kizara.

²⁵Jesús usparuza kaiznara: “Mamaz suras katsa mikwane paiña suwara uztuza tɨnta ɨninnamtu. Mɨnpazha katsa mikwaruzne ka kizamtu: ‘Aune awara kiwain namtamakpas.’

²⁶Katsa mikwa sunkana uzamtukas, une sunkana uzman. An katsaruzne an ainkimikakana namtawa. Ɨnintaruzne kiwainmumikakana namtawa.

²⁷¿Mɨnminkas an tɨnta i? ¿Misharɨ uzmumika an tɨnta mikaki? ¿Kumira karammika an tɨnta mikaki? Misharɨ uzmumika an katsakas, nane apain arau, awaruza kiwainnana.

²⁸Awa nawa naiznintukas, une nakasa maamtu.

²⁹Ap Taittane nawa nara, awaruza ɨninnanapa. Kawarain nane uruza nanamtus, nakasa ɨninnapa.

³⁰Suane une ap ɨnintukin nakasa kuanazi. Suane ap ɨnintukin une uzanazi, doce Judío kwaltuza mɨmanapa, usparuza kaizapnapa.”

³¹Jesúsne sun kaizta: —Simón, Simón. Izti. Satanásne Diosta paikwara, uruza ulmalnapa, Diosta an nɨjkulamanpa.

³²Nane nu akwa Diosta paikwarau, nu Diosta nɨjkulnapa, Dios pit mainmanpa. Nu nawa kailtawane, up añaruza, ap kammuruza, kiwainnari, an tɨnta namanapa.

³³Simónne ussa kaizta: —Anpat. Nane nu akwa kajchira ɨnpain, inakima.

³⁴Jesúsne ussa kaizta: —Pedro, nane nua kaiztus. Ma payu aral kayu aztuchasmin, nune kutña pijikima “nane ussa pianchish” kiznazi.

³⁵Suasne Jesúsne usparuza kaiznara: —An ñancha uruza ɨninnakane, nane uruza pial tuh mɨjchikasakas tuh mɨjchikasakas zapato nukchikasakas ɨninnara. ¿Une chiwazha wemakkiwas? Uspane ussa sɨnkaara: —Chinkas wechimakpas.

³⁶Usne usparuza kaiznara: —Makis, pial tuh mɨjne, kwarawa. Kawarain tuh kwarawa. Mashti mɨjkine, kwaksham painintawa, mashti paina.

³⁷Mane nane Dios pɨnkɨhta na akwa parɨt aizpa ka kiznamtus: “Usne kwail awakana naizanazi.” Wan nawa parɨt aizpa kimtu.

³⁸Uspane kaizara: —Anpat. Izti. Apane paas mashti tu. Usne kaiznara: —Min kwinta kirain.

³⁹Jesúsne pɨpuluras puz kit Olivos ɨzara nura. Sua sunkana ɨkamtɨt. Kammuruzne ussa kwizpa kanpaara.

⁴⁰Sua pianakane, usne usparuza kaiznara: “Diosta paikwarain, kwail kishiamanpa.”

⁴¹Jesúsne usparuztas treinta sakima ɨt kit wakpuj wain kit Diosta kaizta:

⁴²“Ap Taitta. Nu nawa naizninshitchine, nawa naizninmun. Nu kishit aizpa sari. Na kishit aizpa samun,” kizta.

⁴³Maza ángelne chiyuras ara, ussa tɨnta kiwainna.

⁴⁴Akkwan naiztuasmin, Jesúsne an tɨnta Diosta paikwara. Usne kwisha katsa pairara pi pairamɨzta. Kwisha katsa pairara pi aimpikana pilta taizara.

⁴⁵Paikwatpane, kuhs kit kammuruz purakin kailta. Uspa tayaltu akwa, pittarɨt.

⁴⁶Usne kaiznara: —¿Chikishma pittamtuas? Kuhs kit Diosta paikwarain, u kwail kishiamanpa.

⁴⁷Jesús paiña kammuruzkasa kwinta kimtuasmin, akkwan awane ustukin aara. Judaskas, maza doce kammuruztas, an ñancha ɨra. Jesústa kasha ɨt kit paiña matsɨhkin putchunta.

⁴⁸Jesús ussa kaizta: —Judas. ¿Nawa putchuntuasmin, nune nawa kwail kimtukish? ¿Nawa kwail awaruza chɨhkamtukish?

⁴⁹Wan kit aizpa izamtuasmin, Jesúskasa uztuzne ussa mɨmaara: —Anpat. ¿Mashtikasa waya kimuskiwas?

⁵⁰Mazane usparuztas katsa pariyawa kiwainmikasha pian kit numal kail yalta.

⁵¹Jesúsne kaizta: —Sunkana kimun. Jesúsne kiwainmikawa kail sɨn kit ussa namtara.

⁵²Suasmesa Jesúsne katsa pariyaruzpa mikwaruzakas, Dios katsa yalpa izmuruzakas, Judío ɨlapa ɨnintuzakas kwinta kinara. Uspane ussa pizshiara, kajchira sɨpna. Usne usparuza mɨmanara: —¿Une mashtikasa tɨ salakasa aamuskiwas, wiyakimmikara pizna?

⁵³Nane pailta payukima Dios yalta ukasa tuarau. Suane une nawa pizarachi. Mane une nawa pizashimtu, Diablo tɨlkwilta ɨnintu akwa, paiña kwail kinpa.

⁵⁴Suasne uspane Jesústa pizat kit katsa pariyawa yalta mɨlara. Pedrone attishta kanpara.

⁵⁵Uspane yal pianamal ĩn usap kit uzara. Pedrokas usparuzkasa uzta.

⁵⁶Suasmesa ashampa kiwainmikane Pedrora izta. Ĩn usaptukin uzta. Ussa iztawane, usne kaizta: —An ampune uskasa tuarai.

⁵⁷Pedrone ussa kaizta: —Ashampa. Nane ussa pianchish, kizta.

⁵⁸An kwizta mamazne ussa iz kit kaizta: —Nukas Jesúspa kanpammika i, kizta. Pedrone sɨnkara: —Ampu. Nane ussa kanpammika chish, kizta.

⁵⁹Maza ura pailtawane, mamazne an tɨnta kaizta: —Watcha, an ampukas uskasa tuarai. Usne Galilea suras ara.

⁶⁰Suasmesa Pedrone kaizta: —Ampu. Nu kaiztu aizpa pianchish, kizta. Sun urain Pedro paramtuasmin, aral kayu azta.

⁶¹Suasmesa Jesúsne puij kit Pedrora izta. Pedrone Anpat kaizta aizpa nɨjkulta. Anpatne ussa ñamin ka kiztɨt: “Mane aral kayu aztachasmin, nune nawa kutña pijikima ‘ussa pianchish’ kiznazi.”

⁶²Yaltas puztawane, Pedrone tayal kit tɨnta azta.

⁶³Jesústa watsamturuzne ussa ishanat kit aim kiara.