San Lucas 21:2-8

²Sa ihñano wape wihoro pejecʉoricoro pʉa cjoegãre ticoro duhu sãgʉ̃ gʉ̃hʉre ihñahye.

³Tire ihña tuhasa ohõ saha ni yahuahye: —‍Potota niita niaja mʉsare. Ahricoro wape wihoro pejecʉoricoro pehe niñeru sãri acaropʉ duhu sãno apequina ijipihtiyequina ohori yʉhdʉoro ohori ticoro pehe.

⁴Apequina niñeru opana pajiro tiquina ohoepegʉ̃ta tiquina ye pajiro dʉhsare. Ahricoro pehe pejecʉoricoro ijieperota ijipihtiye ticoro ihyatire ticoro dúborigãre oho pehori, niahye Jesu.

⁵Sa ye apequina Cohãcjʉ̃ wʉhʉre ohõ saha niahye: —‍Quehnoañe ʉtã paca mehna yeri wʉhʉ, quehnoa yʉhdʉari wʉhʉ ijicjoare. Masa Cohãcjʉ̃ ya wʉhʉ ijiatire tiquina ohori gʉ̃hʉ ti wʉhʉpʉre quehnoano cũri jire, ni, yahuducuye niahye. Tiquina sa nigʉ̃ Jesu yahuahye tiquinare:

⁶—‍Ahri ijipihtiye mari ihñari wʉhʉsere, ahri ʉtã paca gʉ̃hʉre cohã pehoeta. Ne ihcãria ʉtã tojoasi, niahye Jesu tiquinare.

⁷Tiquiro sa nigʉ̃ tʉhoye tiquina pehe sinituahye tiquirore: —‍¿Buhegʉ, dʉhse ijigʉ̃ mʉhʉ nidiro saha sa waharotari? ¿Pihtiati deco panogã ijigʉ̃ dʉhse ti waha dʉcagʉ̃ ihñanatari ʉsã? ni sinituahye tiquina Jesure.

⁸Jesu yʉhtiahye tiquinare: —‍Quehnoano yeya mʉsa. Sa yena mʉsare apequina tiquina ni mehoñene tʉhoeracãhña. Peyequina masa “Cristo ijiaja yʉhʉ”, ni mehoñequina ahtaeta. Sa niñe, “Yojopʉre pihtiati deco ijiato mehenogã dʉhsare”, nieta. Tiquina sa nigʉ̃ tʉhoeracãhña.