Iluk 21:2-8

²Yetemeko, kaem ding dim bakate, um banim waneng kalun mak u feni kom alew mak de teleko, tum win dukukabiliw tem ka kel dukusu kale.

³Dukului, Yesus e bokolomele: “Feinka! Um banim waneng kalun bu tum win gelgel kuw dukulu kate, u tum win fian dukuliw em so kawtiw biilo atin kuw bakiyemu te.

⁴Nimtew angom? Em so kawtiw bi on kisol banso aluweko, beem anung kuw kuse, kabalak daliw kate, um banim waneng kalun bu mesesem banimeko, ukalem tum win fong gel be alikum kuse kabalak dalu kasike.”, yangse kale.

⁵Beli, mali kawtiw mak bokolomeliw: “Am gemin kunum i Sunbin-Got em am yol aneng kale tum ati so ati so geleweko, kawtiw im Sunbin-Got elo sak dulewsiliw eisneng be so kait atite kolewsiliw kai!”, angsiliw kale.

⁶Angsiliw ding dim bakate, Yesus e bokolomele: “Alik alik yu kilele kililoliwka! Deiw mak ding mak kelei, maka mak teleko, atite eisneng alik alik be tum ati so mak em tikin dim, mak em tikin dim banimeko, alik alik dakaleko, mit da kolewokoliw te.”, yangse kale.

⁷Yangei, ka biliw kawtiw bi elo dakalalomeliw: “Kukuyemin kunum kutaka! Nalem ding ete eisneng be keloke ye? Nomin eisneng ete nu atemeko, beem dim elote kal keluwete: ‘Kaneloke eisneng be kame keloke kai!’, angokoluw a? Ku nulo bokoyema!”, dangsiliw kale.

⁸Dangiwi, Yesus e ilo yan weng mak bokoyemomele: “Wee yutaka! Yu kilelbiko, boliwka! Mali dasuw kunum banso mak teleko, nem wiin dim yulo dasuw weng bokoyemomeliw: ‘Num ding fenbiliw kunum nute te!’, yangokoliw te. Yangeko, mali kawtiw mak ikati teleko, yulo bokoyemomeliw: ‘Kame kuw Yesus em tolomin ding mewso kele kai!’, yangokoliw kate, yu kanelom im weng be kililokoliw te!