LUCAS 21:2-8

²Jøts kuꞌøktyøꞌøxy majtsk ja pyujxmeeñuꞌnk jam tkugoꞌonɨmøø;

³wɨnets ja Jesús ja pyabøjkpɨtøjk tnɨma̱a̱y jøts ja wya̱a̱ñ: ―Janch meets ɨdøꞌøn nnøjmɨ, jøts ku yø kuꞌøktyøꞌøxy ayoobɨ neꞌegɨ myɨnajxpy lyɨmunsɨ yø jam Dios wyɨngujkp øy ɨdøꞌøn yø kyama̱ba̱a̱dɨ sa̱m o pøn yjaꞌ tpɨkta̱ꞌa̱ktɨ.

⁴Jaꞌ yø iiy yojxtɨp midi yø wɨnda̱ꞌa̱nxɨyɨdɨp ya̱m yø kuꞌøktyøꞌøxy ayoobɨ neꞌegɨ tpɨkta̱ꞌa̱ky ja yiktuujnɨk ja ñɨdsɨna̱a̱jyɨk.

⁵Jøts ɨdøꞌøn nɨwɨna̱a̱gɨn jam wyɨnaty tnɨmadya̱ꞌa̱ktɨ ja tsa̱ptøjk, ku ja janch tsuj kyaxɨꞌɨky, ku tsa̱a̱ ja jadeꞌen janch tsuj tmøøtꞌaty, jøts ja nayɨdeꞌen chujkaxɨꞌɨky midi jam wyɨnaty pøngapøn tø tyoxtɨ. Xjats ja Jesús wya̱a̱ñ:

⁶―Ja̱ꞌa̱tp ja tiempɨ ku ya̱ꞌa̱t kyuja̱ꞌwɨgyøxt ɨxa jadeꞌen xꞌejxtɨ, ku yø tsa̱a̱ nɨ tuꞌugɨn kyata̱ꞌa̱nt nɨkɨɨbyety.

⁷Wɨnets ja tyiktøødøø jøts ja tnɨmaadyøø: ―¿Juunɨ wɨndsøn ɨdøꞌøn ja jadeꞌen yja̱tt? ¿Ti døꞌøn ja yiktanɨja̱wɨp jøts ku døꞌøn ja wyɨnaty jadeꞌen yja̱twa̱ꞌa̱ñ?

⁸Jøts ja Jesús wya̱a̱ñ: ―Øyɨm mnayꞌejxꞌetɨdɨt, jøts kidi mee tø mnɨyja̱jtnɨ ñɨwyɨnda̱a̱yꞌa̱jtk. Kumɨ may ja myeꞌendɨt pøn øts nxøøw nugo nadyanɨka̱jpxɨdɨp ku ja ñøꞌømdɨt: “Cristo øts”; “Tø kyaꞌpxy ja tiempɨ.” Kidits mets ja xpanijkxy jatyɨ.