Salomore Gae 2

1

2

3

4

5

6

7

8

¹No Saroŋ mâreŋkonec ʒariŋ moc iŋucne, erâ wâneŋko firindoac fuaekac irec sâc.

²Aricne, joroc biaŋ‐nane e firindoac ʒârâ uupicko fuaekac irec sâc naru jaŋere ŋondeŋko juekac.

³Joroc biaŋ‐nane e woraŋjâczi jâc omane jaŋere ŋondeŋko domaekac irec sâc ŋic socɋâri jaŋere ŋondeŋko juekac.

⁴E maŋjauŋ sâko enarehuc waiŋ gie‐ticnao jowacnu rawec.

⁵Ehuc waiŋ hândâŋne nareme nâqiŋnepo â woraŋ gumecnume nâpe bâgunucnuwec, no ere boc enare sâqorekac i!

⁶Meqana‐ticnezi qizec roŋgâŋ enarewec â mefâre‐ticnezi hâpocnuwec.

⁷O Jerusalemte otâfâc, no tiki noniŋ â kâte bulimakao jaŋerao ɋetickehuc ŋaza sanaŋkepe: Ŋoŋe joroc biaŋ‐nane kosa mi wiwickeniŋ, e jahac mana ɋâɋârerâ faharezejec.

⁸Mananiŋ! Joroc biaŋ‐nane warekac. Tikine tikine â facne facne tara he tara he warekac hâcne.

⁹Joroc biaŋ‐nane e tiki noniŋ iŋucne, â kâte bulimakao motecnezi ŋicne irec sâc. Honeniŋ, sac râpenao warejec domakac, ehuc qâqâtâc kataŋko ʒâŋe fime wefukac.

¹⁰Joroc biaŋ‐nane e kecʒiŋuc muhuc nazakac: “Kogoc biaŋ‐nane, go faharerâ warec. Manakic, mâmâteŋ dameŋ i tarakac, â hoe dameŋ i wâc tarakac jaha.

¹²Kâteo jâc wiac mocwâc fie âric eŋgopieŋ â wipe jaŋe dâŋ hawari biaŋne eŋgopieŋ erâ hapâ jaŋe jâchândâŋko hehefârec ehuc tumaŋneeŋgopieŋ.

¹³O joroc biaŋ‐nane, go nemuja fârinezi woze qeuc eme â waiŋzi ârickehuc âsu biaŋ fiha norao warezemec.

¹⁴O kogoc biaŋ‐nane, qânâ â mâreŋ hawecko soŋkerâ juekic go fua taniŋketec ʒâŋe maige honehape dâŋetec maracge manazepac, go ʒâŋe hawarige biaŋne â marac faŋfaŋ jâmbâŋ jukomec hâcne.

¹⁵Ŋoŋe puruŋ jaŋe ŋafeo fisirâ suc qeuc me hândâŋ wiac gâcne nâ sipiric ehapie honec‐joparâ rocjopa‐nârenʒepieŋ.”

¹⁶Joroc biaŋ‐nane e nore biŋe eha noni wâc ere biŋe ekopac, e lamafâc‐ticne sapa biaŋnao râec‐jopaekac.

¹⁷O joroc biaŋ‐nane, go hae owâeha nâkumuc ʒorame norao warezemec. Go tiki noniŋ â kâte bulimakao motecnezi ŋicne tiki mâreŋko jueŋgopieŋ jaŋere sâc ezemec.