SALMOS 96:3-11

³Ipan nochi taltipacti ma titepohuilica ihueyitilis huan nochi tamanti cuajcualtzi cati quichijtoc. Huan nochi masehualme ma tiquinpohuilica nopa huejhueyi tamanti cati yaya quichihua.

⁴Pampa TOTECO nelía tahuel hueyi huan quinamiqui ma tijhueyimatica. San yaya nelía temajmati huan ne sequinoc cati masehualme quintocaxtíaj dioses, amo.

⁵Pampa nochi nopa dioses cati quinhueyichihuaj ipan sequinoc talme, amo teno ininpati. Inijuanti san elij teteyome cati masehualme quinchijchijtoque. Pero TOTECO yaya quichijchijqui ilhuicacti.

⁶Campa itztoc Toteco senquisa onca itatanex huan temitoc ica ihueyitilis. Huan ipan itiopa onca ichicahualis huan iyejyejca.

⁷Nochi anmasehualme ten nochi taltipacti, xitepohuilica para san TOTECO quipiya chicahualisti huan san yaya hueyi.

⁸Xijtepanitaca TOTECO quej quinamiqui. Xijhualiquilica tacajcahualisti huan xiyaca icalixpa itiopa.

⁹Xihualaca huan xijhueyichihuaca TOTECO. Quena, xijhueyichihuaca ica se amonemilis cati cuajcualtzi huan tatzejtzeloltic. Huan nochi taltipacti ma huihuipica iixpa.

¹⁰Xiquinpohuilica nochi talme para Toteco tanahuatía. Taltipacti quitalijtoc cuali huan amo quema mijcuenis campa quitatzquiltijtoc. Huan Toteco Dios xitahuac quintajtolsencahuas nochi altepeme.

¹¹¡Ma paqui ilhuicacti huan nochi taltipacti! ¡Nochi huejhueyi at ma mocoxonica iixpa Toteco ica paquilisti!