SALMOS 95:6-10

⁶Xihualaca, ma tijhueyichihuaca huan ma timoixtapachoca iixpa TOTECO, yaya cati techchijchijqui.

⁷Pampa yaya toDios huan tojuanti tiimasehualhua. Tiitztoque quej tiiborregojhua cati yaya quinmocuitahuía. Xijtacaquilica ama cati quiijtohua Toteco:

⁸“Amo ximoyoltetilica quej israelitame quichijque huejcajquiya ipan nopa huactoc tali cati itoca Meriba huan Masah.

⁹Nopona amohuejcapan tatahua nechyejyecojque para quiitase taya nijchihuas. Huan quichijque ya ni masque ipa ya quiitztoyaj nopa huejhueyi tiochicahualnescayot cati na nijchijtoya iniixpa.

¹⁰Para cuarenta xihuit nicualantoya inihuaya, pampa iniyolo huan inintalnamiquilis eltoya huejca ten na. Huan hasta ama amo motemacatoque quitoquilise notanahuatilhua.