SALMOS 76:5-12

⁵Nopa tocualancaitacahua cati más quipiyayayaj chicahualisti, quintamitacuijcuilijque. Toixpa tepejtoque mictoque. Yon se ten inijuanti ayecmo hueli quitananas imax para techtehuis.

⁶Quema ta tiToteco, cati tiiDios Jacob, tiquinajhuac nopa cahuayojme huan cati tejcotoyaj ininpani, nochi huetzque hasta talchi.

⁷¡Yeca nochi quiitaj para tahuel titemajmati! Huan amo aqui huelis quiijyohuis ijcatos moixpa quema tahuel ticualantoc.

⁸Hasta nepa ilhuicac titayolmelahua para titetatzacuiltis. Huan ni taltipacti majmajqui huan amo molini moixpa,

⁹quema timotananqui, Toteco Dios, para tiquintatzacuiltis cati quichihuaj cati amo cuali, huan para tiquinmanahuis nochi cati moechcapanohuaj ipan ni taltipacti.

¹⁰Ta tijtequihuía inincualancayo masehualme para sequinoc ma mitzhueyimatica. Huan tijtequihuis para más monextis moyejyejca.

¹¹Xijchihuaca nochi cati anquitajtolcahuilijtoque TOTECO para anquichihuase. Sese ma quihualica nopa tamanti cati quitencahuilijtoc para quimacas Toteco Dios. Monequi ma tijhueyitepanitaca huan ma tiquimacasica,

¹²pampa yaya quintamiltilía ininemilis nopa huejhueyi tayacanani. Quichihuas para nochi tanahuatiani ipan taltipacti ma quiimacasica.