SALMOS 62:1-8

¹Na san ipan Toteco Dios nimochiya para yaya ma nechmanahui, pampa san ya hueli temaquixtía.

²Nimotatía ipan ya para amo teno nechajsis. San yaya nechmaquixtía huan nechmocuitahuía quema huala taohuijcayot. Amo teno hueli nechpanos.

³Pero ¿hasta quema tamis nocualancaitacahua nechtehuise? Ayecmo nijpiya más chicahualisti quej tanahuatijquet ipan notanahuatilis. Nocualancaitacahua quisencahuaj quenicatza huelis nechtahuisose. Nechitaj quej se tapepecholi o tepamit cati huetzisnequía.

⁴Quena, san moilhuíaj san sejco quenicatza huelis nechtzontamiltise. Quinpactía quitacaquilise istacatili huan tacajcayahualisti. Ica inincamac nechcamanalhuíaj cuajcualtzi, pero ipan iniyolo nechtelchihuaj.

⁵Pero na san nimochiya ipan Toteco Dios, san nimochiya para yaya ma nechmanahui, pampa san ya hueli temaquixtía.

⁶Nimotatía ipan ya para amo teno nechajsis. San yaya nechmaquixtía huan nechmocuitahuía quema huala taohuijcayot, yeca san ipan ya nimotemachía.

⁷San Toteco Dios hueli nechmaquixtis huan sempa nechhueyitalis iniixpa sequinoc. Yaya nechtatía huan nechfuerzajmaca. Nechmocuitahuía para amo ma nechajsi cati fiero.

⁸¡Annomasehualhua, nochipa ximotemachica ipan Toteco Dios! Xijpohuilica nochi cati eltoc ipan amoyolo, pampa san yaya hueli techmocuitahuis ica cati amo cuali.