Buk Song 62:1-8

¹Devit i raitim dispela song. Man i bosim musik i mas tokim ol man long singim song long nek ol i kolim Jedutun. Mi save bilip strong long God wanpela tasol. Em wanpela tasol i save kisim bek mi na mi stap laip.

²Em wanpela tasol i wasman bilong mi na helpim bilong mi. Em wanpela tasol i strongpela banis bilong mi. Olsem na mi no ken lus long pait. Nogat tru.

³Hamas taim yet yupela i laik pait long mi bilong bagarapim mi? Yupela i laik bai mi bagarap olsem wanpela banis i pundaun na i bruk olgeta.

⁴Mi gat biknem, tasol yupela i laik bagarapim biknem bilong mi. Yupela i laikim tumas tok giaman. Yupela i save autim gutpela tok long God i ken mekim gut long mi, tasol long bel bilong yupela yupela i tok olsem, “Mipela i laik bai God i mas bagarapim em.”

⁵Mi save bilip strong long God wanpela tasol. Na mi wet long em wanpela tasol i helpim mi.

⁶Em wanpela tasol i wasman bilong mi na helpim bilong mi. Na em wanpela tasol i strongpela banis bilong mi. Olsem na mi no ken lus long pait. Nogat tru.

⁷God wanpela tasol i save kisim bek mi na em yet i save givim biknem long mi. Em i strongpela wasman bilong mi. God yet em i strongpela banis bilong mi na ol birua i no inap bagarapim mi.

⁸Yupela ol lain bilong mi, oltaim yupela i mas bilip long God. Yupela i mas autim olgeta hevi na olgeta tingting bilong yupela long em. Long wanem, yumi ken i go long em na i stap gut.