SALMOS 56:5-11

⁵Talojtzitzi quipataj nocamanal huan san moilhuíaj quenicatza huelis nechchihuilise cati amo cuali.

⁶Mosentilíaj huan quisencahuaj taya nechchihuilise. Teipa motatíaj ojtenti huan nechchiyaj ma nipano para nechmictise.

⁷Toteco Dios, xijtachili nochi inintaixpanolhua huan xiquintatzacuilti. Ica mohueyi cualancayo, xiquintahuiso hasta talchi.

⁸Ta techitztoc quesqui hueltas nimochololtijtoc huan nimochoquilijtoc. Nochi noixayo tijsentilijtoc huan ticajoctoc ipan se frasco. Huan ipan moamatapohual tiquijcuilojtoc quesqui imiyaca.

⁹NoTeco Dios, quema nimitztzajtzilía para techpalehui, nochi nocualancaitacahua nimantzi cholohuaj. Quej nopa eli pampa cuali nijmati para ta tiitztoc nohuaya para techpalehuis.

¹⁰Na nimotemachía ipan Toteco Dios. Quena, nimopaquilismacas ipan TOTECO icamanal, por nochi cati nechtajtolcahuilijtoc nechchihuilis.

¹¹Quena, nimotemachía ipan Toteco Dios huan amo nimajmahui. ¿Taya huelis nechchihuilis se masehuali?