Salmos 55:11-23

¹¹Nazrate̱ xe̱zre nigá da cale̱la da dxelune̱', ne tu dxelúnzqueze̱' da we̱n lazre', ne xel-la' dxezí xe̱ lu neza chee̱ na.

¹²La guca tu benne' bénnea' dxedábague̱' neda', bénnea' be̱n le̱' chia', na' bchaga lawa' da na'. La guca tu benne' dxecuídene̱' neda' bénnea' gudábague' neda', na' bcache cuina' lau le̱'.

¹³Lue', bénnea', gucu' ca tu le sa' ljwezra'. Bsi'u neda', ne gucu' tuze neda'.

¹⁴Tu zren bchálajdxu du lázredxu, ne lu xel-la' zri'i lazre' gudadxu lu xu'u lizre Dios.

¹⁵Dios, be̱n que̱la xel-la' gute benne' ca' dxelune̱' da cale̱la chadite̱. Be̱n xelexú'e̱ lu lataj ba xa' zaj naca bane̱', lawe' da nazrate̱ xu'u lizre̱' da cale̱la da dxelune̱'.

¹⁶Ca naca chia' neda', bláwizra' Dios, na' Xrana' Dios bselé̱' neda'.

¹⁷Che zílala, ne wagubizra, ne ca dxebía gubizra guchálajle̱queza' Dios, ne guláwizra' Le̱', na' Le̱' xenne̱' chia'.

¹⁸Xexá'awe̱' bénne'du xu'a lu wedil-la da dxaca chia' neda', ne gune̱' cueza' zri lazra', lácala zaj zra' zánete̱ benne' dxeledábague̱' neda'.

¹⁹Wene Dios, na' guzría xí'queze̱' benne' ca'. Naque̱' Bénnea' zúatequeze̱' dxenná be'e̱ nédxute̱. Caní gune̱' chee̱ benne' ca' lawe' da quebe dxuluché̱'e̱ ca dxelune̱', ne quebe dxelezrebe̱' Dios.

²⁰Guchisa na' benne' we̱n da zrinnaj chee̱ gu'e̱ benne' ca' dxelebeza zri lazre̱' nen le̱'. Gudíchaje̱' xrba chee̱ xel-la' wezría da be̱ne̱' nen benne' ca'.

²¹Dizra' bchálaje̱' zaj naca na dizra' zren lazre', san xu'u lázrdawe̱' xel-la' dxezrá'a. Dxune̱' xrtante̱ dizra' dxuchálaje̱', san zaj naca na ca xia da zaj nalále̱'e̱.

²²Bda xua chiu' cuzru Xránadxu, na' Le̱' gutipe̱' lazru'. Québequeze gu'e̱ lataj cheajchaze benne' chawe' tu chi'ize.

²³Lue', Dios, gunu' xelexú'u benne' ca' dxelune̱' da cale̱la lataj ba xa', benne' dxelute benne', ne benne' dxelezí xe̱'e̱, gate quebe ne xelezrine̱' gachaj catite dxal-la' xelaca bane̱', san neda' guxrén lazra' Lue'.