Salmo 55:11-23

¹¹Panangdadael di maam-amag sin siyodad ay sana, sin kakalsada, ad-adoy sowitiken ya paligaten da.

¹²Mo kalaban ko di lomaslasoy, anosak koma. Mabalin abe ay ilisiak daida.

¹³Ngem din nangamag isna et esa ay gayyem ya kabsat, esa ay ib-a.

¹⁴Ed idi, mayat di panagkadwa mi ay dowa, sin Timplo yan mandaydayaw kamin sik-a.

¹⁵Masapsapa koma din kalaban ko ay matey. Emey da koma ay sibibiyag sin kad-an di natey, tan mo daida, kaman dan panbeeyan di lawa, pag lawa di nemnemnemen da.

¹⁶Ngem mankedawak si badang mo et omisalakan ka.

¹⁷Inagsapa, minasdem ya linablabi, Apo, ay dengngem din adawag ya bayeweng ko.

¹⁸Mantitinolong din ad-ado ay kalaban ko, ngem omisalakan ka et adiak maan-ano.

¹⁹Sik-a ay Diyos ay nanturay manipod sin logi na, patgam koma din kararag ko et abakem daida, tan adi da manbalbaliw gapo ta adi da emegyat en sik-a.

²⁰Din gait ko ed idi yan kontraena din gagayyem na, dinokogana din kari na.

²¹Din kali na yan nalamlamoyot mo mantikilya ya lana, ngem matadem ay kampilan di kaiarigana, sin nemnem na yan way liget na.

²²Apo, italek min sik-a din problima mi et salaknibam dakami, adi ka baybay-an ay maabak kami.

²³Makapese da ya maetek da, ngem sik-a ay Diyos yan iturong mos daida sin kaot da et matey da ay masapsapa. Ngem sak-en pay, mantalekak en sik-a.