SALMOS 55:11-23

¹¹Tatajco nopa altepet quichihuaj miyac tamanti cati amo cuali, huan amo onca tatepanitacayot. Ipan tianquis huan campa hueli momictíaj, tachtequij huan tacajcayahuaj.

¹²Amo elqui se nocualancaitaca cati nechcajcayajqui, pampa sinta quej nopa eltosquía, huajca niquijyohuijtosquía. O hueltosquía nicholos huan nimotatis.

¹³Pero elqui se cati nemiyaya nohuaya, se cati nechyacanayaya huan cati nonelhuampo.

¹⁴Quena, elqui yaya cati sentic timopohuiliyayaj nopa tamanti cati tijpixtoyaj ipan toyolo, huan cuajcualtzi timocamanalhuiyayaj quema san sejco tiyahuiyayaj ipan mochaj, Toteco Dios.

¹⁵Ma talochmiquica nochi nocualancaitacahua huan ma yaca hasta micta quema noja yoltoque, pampa ipan ininchaj huan ipan iniyolo san onca tajtacolot.

¹⁶Pero na san nijtzajtzilis Toteco Dios para ma nechmaquixti. Huan quena, temachti yaya nechmaquixtis.

¹⁷Na nimotatajtis ica ijnaloc, ica tajco tona huan ica tiotac. Huan yaya nechtacaquilis huan nechnanquilis.

¹⁸Ipan tatehuilisti yaya nechmanahuis, masque tahuel miyac nocualancaitacahua nechtehuise chicahuac.

¹⁹Toteco Dios cati ipa itztoc huan tanahuatijtoc hasta ten huejcajquiya, yaya nechtacaquilis huan quintzontamiltis. Pampa nocualancaitacahua amo quipataj ininemilis cati fiero, yon amo quitepanitaj itanahuatil.

²⁰Nopa masehualme cati amo cuajcualme momatananaj para quintehuíaj hasta inihuampoyohua. Quiixpanoj nopa camanali cati quichihuaj inihuaya sequinoc.

²¹Quitequihuíaj camanali cati nelcuajcualtzi huan yamanic quej mantequilla, pero ipan iniyolo san moilhuíaj quenicatza tatehuise. Nochi cati quiijtohuaj eltoc alaxtic quej aceite, pero ixtacatzi teyolcocohuaj ica camanali quej quema timotzontequis ica macheta.

²²Nochi motequipachol xijcahua imaco TOTECO huan yaya mitzmacas temachili. TOTECO amo quicahuas ma huetzi se cati quitepanita.

²³Pero ta tinoTeco Dios, tiquintitanis nocualancaitacahua ipan nopa ostot cati tahuel huejcata. Nopa temictiani huan istacatini amo itztose yon tajco ten ininemilis, pampa amo huejcahuase itztose ipan ni taltipacti. Pero na nochipa nimotemachis ipan ta para techmaquixtis.