SALMOS 51:3-19

³Žeyónbi'a bži'a chio' Le' ḻen dan' bena'. Doḻa' ka' bena' žesbága'gaken neda' ẕia.

⁴Ḻawo' Le' bena' doḻan'. O', ḻawo' Le'. Bena' da' bi naken chawe' ḻawo' Le'. Ki ẕnno' naken chia' nich gak bia' nako' chawe' ni'a che da' ẕnno'. Naken ḻi ḻaže' kan ẕchi'a ḻažo'o benách ka'.

⁵Bwia nga, bache nbága'kza' doḻa' katen' golja'. Ḻo doḻa' wzoakza' katen' bsan x̱na'a neda'.

⁶Žak ḻažo'o Le' soa da' likze ḻo yichj ḻáẕda'wa', na' ḻo yichj ḻáẕda'wa' bzo' yeḻa' žejní'il.

⁷Bka'n chawe' neda' ḻen da' ẕkonlo' žin, na' yega'na' chawe'. Wdíb neda', na' gakža' chiche ka nak bejw.

⁸Bzoa chia' yeḻa' žebele, na' yeḻa' ba nez, na' žit ka' da' yoa'a gá'ngaken choch, žit ka' bdichjo' Le'.

⁹Bi chejsá' ḻažo'o doḻa' ka' nbaga'a, na' beká'a yógo'te da' bi nak chawe' da' bena'.

¹⁰Dios, beyón chawe' yichj ḻáẕda'wa', na' bzoa to be' ḻi ḻaže' ḻo yichj ḻáẕda'wa'.

¹¹Bi wkwaso' neda' ḻawo' Le', na' bi yekó'o be' la'y chio' ḻo yichj ḻáẕda'wa'.

¹²Bebí'i chia' yeḻa' žebele che yeḻa' weslá chio', na' bzoa choch be' chawe' dan' yoa'a.

¹³Naž wsedla' benne' wen da' ẕinnj ka' da' žaz ḻažo'o góngake', na' benne' doḻa' ka' yeyákgake' chio' Le'.

¹⁴Beslá neda' ḻo ẕia da' nbaga'a, beta' to benne'. Dios, nako' Benne' Weslá chia', na' goḻkza' che da' chawe' da' nako' Le'.

¹⁵X̱ana' Dios, bsaljw žoa'a, na' wzenla' benách ka' da' we ḻawa' Le'.

¹⁶Bi žaz ḻažo'o biado' ka' gota'-ba' ḻawo' Le', na' bi žaz ḻažo'o biado' ka' wzeya' ḻawo' Le'.

¹⁷Da' žaḻa' ko'ožo ḻaw Dios da' žaz ḻaže'e naken to ḻaẕdo' gax̱jw ḻaže'. To ḻaẕdo' gax̱jw ḻaže', na' da' žeyát ḻažen' bi wzó' cheḻa'ale, Dios.

¹⁸Ḻo yeḻa' ži'i ḻaže' chio', ben chawe' yež Sión. Beyón ze'e da' žape chi'in yež Jerusalén'.

¹⁹Naž chaz ḻažo'o biado' ka' gotto' ḻawo' Le' ḻo da' nak chawe', na' biado' ka' wzeyto' ḻawo' Le'. Naž gótgake' biado' ka' ḻo bkog la'y chio'.