Psalm 51:3-19

³Pwe i asa duen ai wiadar me sued, o dip ai me sansal ong ia ansau karos.

⁴Ong komui eta me i wiai dip ong, o wiadar sapung mon silang omui, pwe komui me pung eta ni omui masan akan, o komui makelekel eta ni omui pan kadeikada.

⁵Kotin masani, me i ipwidier ni sapung, o in ai ape kin ia dar ni mang en dip.

⁶Kotin masani, kom kin kotin mauki melel, me mi wasa rir; kom kin kasale ong ia lolekong rir.

⁷Kom kotin kamakele kin ia isop, pwe i en minla, widen ia, pwe i en puetepueteta sno.

⁸Kom kotiki ong ia peren o popol, pwe kokon ai kan, me kom kotin kawelar, en insenemaula.

⁹Kom kotin sopwei sang dip ai kan, o kotin lapwada ai sapung karos.

¹⁰Maing Kot, kom kotin wiai ong ia mongiong makelekel, o kotin kawiliakapada ngen i.

¹¹Kom der kase ia la sang mon silang omui o der kotiki sang ia ar Ngen saraui.

¹²Kom kotin pur ong kamait ia la ki omui sauasa ia, o kotiki ong ia ngen en kaperen.

¹³I pan padaki ong me katiwo kan duen al omui kan, pwe me dipan akan en wuki ong komui.

¹⁴Maing Kot, kom kotin dore ia la sang dip en nta, pwe komui Kot ai saunkamaur, pwe lo i en kapinga omui pung.

¹⁵Maing Ieowa, kom kotin kasar pasang kilen au ai, pwe au ai en kapikapinga komui.

¹⁶Pwe kom sota kotin mauki mairong kamela — a ma iei, i pan wiada — o mairong isis kom sota kotin kupura.

¹⁷A iet mairong, me Kot kin kotin kupura: Ngen olar, o mongiong insensuedalar, o karakarak, iei me komui Maing Kot sota pan kotin mamaleki.

¹⁸Kom kotin sauasa Sion ki omui kalangan, kotin kauada kel en Ierusalem.

¹⁹Komui ap pan kupura mairong pung, mairong isis o mairong unsok. I ansau me kau ol pan iseda pon sapwilim omui pei saraui.