Salmos 51:3-19

³An ibmar-noar-imaksadi an magar itoged, an-isgusad an nue wisid.

⁴Bab-Jehová, beginbi, unnila beginbi an isgusad. Be-asabin an ibmar-isgana imaksad. Agala, be-igar-nabogedgi be-igar-mesedi innikigwadid. Be-igar-naboged dule geg egi akarsoged.

⁵An gwalulesad-akale, an dule-isgana gued, an sapibeneggi-maigusad-akale, bato an dule-isguedid.

⁶An nue-wisid, be dule-inniki-gudiid nue-sabed. Burbale, nue-binsaed-nikadaed be an-odurdaksad.

⁷An swilidik-guega, hisopo-gagangi be an-nudake. An boo-sibudikidba bur bule sipuu guega, swilidik be an-imake.

⁸Weligwar be an-imake, yeer-ito be an-imake, be an-san-sabsur-odurdaksad gannar yeer-itoge be imake.

⁹An-isgued mer be bar ebinsae, an-ibmar-isgana-imaksad bela be osuloge.

¹⁰Bab-Dummadye, gwage-swilidikid be anga nasike. Burba-swilidikid be anga uke.

¹¹An be-walik-gudiidgi mer be an-ononnoge. Be-Burba-Isligwaled mer be angi obane.

¹²Be-abonolegedgi-weligwar-itolegedi, gannar be anga udage. Uaya-nikadae be an-imake.

¹³Geb deyobi, be-igar-maidgi-yoledimalad an be-igargi odurdakoed, geb dule-isgudimalad gannar bese nonimaloed.

¹⁴An-Bab-Dummad-an-abonogedye, an dule-ibe-ablis-eosadgi be an-ollorsae, adi, an be-igar-innikigwadgi namakdii guegar.

¹⁵Bab-Dummadye, an be-nug odummogega, ibmar-biega be an-imake.

¹⁶Ibmar-ukleged an bega-ukele, be yeerdakosulid. Ibmar-durgan-ogumakar-ukleged an bega-ukele, be abingaosulid.

¹⁷Ar begardi, dule-na-e-isguedga-wile-itogedi, ibmar-uklegedba bur-nued gued. Bab-Dummad, dule-na-e-isguedga-bukib-itogedi, bedi isdar daksulid.

¹⁸Be-nued-binsaedbali, Sión-neggwebur-nasgumai be imake. A-Jerusalén-neggwebur-e-galu-dummagan be gannar ogwiche.

¹⁹Geb be-igar-mesisadba-ibmar-bega-ukleged be abingaoed. Ibdurgan-bela-gwagwar-ogumakar-bega-uklegedi be yeer dakoed. Geb moli-bebe-nikad-sapingan bega-ibmar-ogumakar-ukleged-ailagi ukledoed.